Qazaqstan vırtýaldy London kitap jármeńkesine qatysty
NUR-SULTAN. QazAqparat - Qazaqstan Respýblıkasy táýelsizdiginiń 30 jyldyǵyn atap ótý sheńberinde Qazaqstan ádebıetiniń úzdik týyndylary 2021 jylǵy vırtýaldy London kitap jármeńkesinde usynyldy.
Bul týraly QazAqparat QR Syrtqy ister mınıstrliginiń baspasóz qyzmetine silteme jasap habarlaıdy.
Baspasóz qyzmetiniń málimetterine qaraǵanda, Qazaqstannyń Ulybrıtanııadaǵy Elshiligi Qazaqstan Respýblıkasynyń Ulttyq akademııalyq kitaphanasymen (UAK) jáne «Ulttyq aýdarma bıýrosy» Koǵamdyq qorymen (UAB) birlesip, jármeńkege 21 maýsym men 1 shilde aralyǵynda qatysty.
London kitap jármeńkesi – baspa, aýdıo, kıno, teleónimderdi jáne sandyq formattaǵy mazmundy satýǵa jáne taratýǵa, sondaı-aq olardyń baspa quqyqtaryn talqylaýǵa arnalǵan jahandyq alań. Jyl saıyn jármeńkede álemniń túkpir-túkpirinen 25 myńnan astam baspa isi mamandary jınalady. 2021 jylǵy jármeńke tek sandyq formatta ótti.
«30 Years of Independence of Kazakhstan» (Qazaqstan táýelsizdigine 30 jyl) brendimen bezendirilgen Qazaqstannyń vırtýaldy stendinde aǵylshyn tilindegi kitaptar, shyǵarmalardan úzindiler, beınejazbalar, onlaın-kontsertter, sondaı-aq taqyryptyq veb-saıttarǵa siltemeler qoljetimdi boldy.
Qazaqstandyq stendte usynylǵan basylymdardyń ishinde Shoqan Ýálıhanovtyń tańdamaly shyǵarmalary, Zamanaýı qazaq ádebıetiniń antologııalary, sondaı-aq Abaı Qunanbaıulynyń shyǵarmalar jınaǵy da boldy. Atalmysh aǵylshyn tildi basylymdar 2019 jáne 2020 jyldary Kembrıdj ýnıversıtetiniń baspasymen seriktestikte basylǵan.
Sonymen qatar stendte UAK jańa elektrondy kitaphanasynyń kitaptary jáne UAB Oksford ýnıversıteti baspasymen áriptestikte jarııalaǵan Oksford ekonomıkalyq jáne áleýmettik sózdikteri usynyldy. UAB sonymen qatar 500 myń sózden turatyn aǵylshyn-qazaq jáne qazaq-aǵylshyn tilderindegi Oksford qazaq sózdiginiń jobasyn usyndy. Sózdiktiń basylýy 2021 jyldyń sońyna deıin kútilýde.
Jármeńke ashylǵannan keıin Qazaqstannyń onlaın-stendine álemniń túkpir-túkpirinen eki júzge jýyq adam keldi. Jármeńke materıaldary myna silteme boıynsha 16 shildege deıin qoljetimdi bolady.
