Qazaqstan VII Astana ekonomıkalyq forýmyna daıyndyq ústinde
ASTANA. 9 qazan. QazAqparat - Qazaqstan VII Astana ekonomıkalyq forýmyna daıyndyq ústinde. Búgin Astanada ótken baspasóz máslıhatynda QR Parlamenti Senatynyń depýtaty Serik Nógerbekov VIII KAZENERGY Eýrazııalyq forýmynyń qatysýshylaryn Astana ekonomıkalyq forýmynyń baǵdarlamasyn onlaın rejımde talqylaýǵa shaqyrdy.
Senatordyń atap ótýinshe, Qazaqstan qazir halyqaralyq jahandyq forýmdardy kóptep ótkizip júr. Sonyń arqasynda elimiz álemdik dıskýssııa alańyna aınaldy.
«Sizderdi jetinshi Astanalyq ekonomıkalyq forým men Daǵdarysqa qarsy Dúnıejúzilik konferentsııanyń onlaın-jobasyna belsene qatysýǵa shaqyramyz. Biz álemdik qaýymdastyqtyń pikiri men qalaýyn bilip baryp, atalǵan konferentsııalardyń baǵdarlamasyn jasaǵymyz keledi», - dedi S. Nógerbekov.
Aıta ketý kerek, Astana ekonomıkalyq forýmy álemdegi eń bedeldi de iri forýmdardyń biri bolyp sanalady. Jylda ótetin bul forýmǵa Memleket basshysy Nursultan Nazarbaev qatysady. VII Astana ekonomıkalyq forýmy 2014 jyldyń 21-23 mamyrynda ótedi dep josparlanǵan.
