Qazaqstan-Vengrııa ınvestıtsııalyq qory Aqtóbede salynatyn jylyjaıǵa qarjy bóldi
AQTÓBE. QazAqparat - Qazaqstan-Vengrııa ınvestıtsııalyq qory Aqtóbede salynatyn jylyjaıǵa 12 mıllıon dollar qarjy bóldi. Bul týraly «QazAgro» Holdıngi» AQ baspasóz qyzmeti málimdedi, dep habarlady QazAqparat tilshisi.
Investıtsııalyq qor Qazaqstanǵa tańdaý jasady. Aqtóbede aýmaǵy 20 gektar bolatyn jańa jylyjaı salynady. «QazAgro» ulttyq basqarýshy holdıngi» AQ, Vengrııanyń «Eksımbank» jáne CCL Capital basqarýshy kompanııanyń qatysýymen qurylǵan tikeleı ınvestıtsııalardyń Qazaqstan-Vengrııa qory jylyjaı qurylysyna 12 mıllıon dollar bóldi. Jylyjaı úsh jyl boıy kezeń-kezeńimen salynady. Aqtóbede boı kóteretin jylyjaı Nıderlandynyń Ultra Clima tehnologııasymen jabdyqtalady. Artyqshylyǵy jylyjaı jartylaı jabyq bolady. «QazAgro» Holdıng» AQ baspasóz qyzmetiniń habarlaýynsha, FoodVentures (Gollandııa), «ADM Capital» (Vengrııa) jáne «Green Capital Kazakhstan» JShS (Qazaqstan) kompanııalary arasyndaǵy úshjaqty kelisimge qol qoıylǵan bolatyn. Kelisim Astanada ótken «AgroInvest Forum 2017» agroónerkásiptik ınvestıtsııalyq forým kezinde jasaldy.
«Basqa elderdegi uqsas keshenderdi basqarýdaǵy bizdiń tájirıbemiz mol. Sondaı-aq aýyl sharýashylyǵy salasyndaǵy Gollandııanyń jetekshi kompanııalaryndaǵy jańa tehnologııalar qysqa merzim ishinde josparlanǵan kórsetkishterge qol jetkizýge múmkindik beretinine senimdimiz. «Ultra Clima» tehnologııalaryn paıdalaný operatsııalyq shyǵyndardy azaıtyp, ónimniń sapasyn arttyrýǵa septigin tızigedi. Bul básekeles ortada bizdiń artyqshylyǵymyz bolyp sanalady»,- dedi FoodVentures B.V. ókili Dırk Aleven.
Al jylyjaı qurylysyna jaýapty qazaqstandyq seriktes óńirde bul jumysty shaǵyn kásipten bastaǵan.
«Biz Aqtóbe oblysynda ózimizdiń jylyjaı bıznesimizdi birneshe jyl buryn shaǵyn jobadan bastadyq. Jylyjaı sharýashylyǵy - ınvestıtsııa salýǵa yńǵaıly, ońtaıly sala. Bıznesti keńeıtý úshin birneshe nusqany qarastyryp, CCL Capital kompanııasymen seriktes bolýdy uıǵardyq. Kompanııa arqyly halyqaralyq tehnologııalardyń múmkindikterin paıdanamyz, ári bul senimdi seriktes», - dedi jobanyń qazaqstandyq seriktesteriniń biri Qýanysh Qabıdenov. «QazAgro» holdıngi» AQ Basqarma tóraǵasy Nurlybek Malelovtiń aıtýynsha, tikeleı ınvestıtsııalar qorynyń jylyjaı qurylysyna qarjy bólýi elimizdegi agroónerkásiptik kesheniniń tartymdylyǵyn dáleldeıdi.
