Qazaqstan Venaǵa tikeleı áýe reısin qaıta ashýǵa nıetti
ASTANA. QazAqparat - Qazaqstan Avstrııamen tikeleı áýe qatynasyn qaıta jandandyrmaq, dep habarlaıdy QazAqparat tilshisi.
Búgin Astanada kólik jáne ınfraqurylym salasy boıynsha Qazaqstan-Avstrııa jumys tobynyń úshinshi otyrysy ótti.
«Otyrys QR Investıtsııalar jáne damý birinshi vıtse-mınıstri Roman Sklıardyń jáne Avstrııa Respýblıkasynyń Kólik, ınnovatsııa jáne tehnologııa mınıstrliginiń Bas hatshysy Andres Raıhardtyń teń tóraǵalyǵymen ótti. Kezdesý barysynda taraptar eki eldiń kólik tasymaldaryn damytý, kólik dálizderin qurý, tranzıt, kóliktegi tsıfrlandyrý máselelerine qatysty sońǵy ózgerister týraly aqparattarmen almasty», - delingen Azamattyq avıatsııa komıtetiniń resmı habarlamasynda.
Sondaı-aq, qazaqstandyq tarap eki el arasyndaǵy tikeleı áýe baılanysyn jandandyrýdyń mańyzdylyǵyn atap ótip, jýyq arada osy másele boıynsha kelissózder bastaýǵa daıyn ekendigin jetkizdi. Avstrııalyqtarǵa Astana men Venany jalǵaıtyn tikeleı áýe reısin ashý usynyldy.
