Qazaqstan velosportyna arnalǵan kórmede A. Vınokýrovtyń eń alǵashqy jetistikteri týraly bilýge bolady
ASTANA. QazAqparat - Búgin «Saryarqa» velotreginde «Aqtóbeniń altyn medalinen Londonnyń altyn medaline deıin» atty kórme ashyldy.
Onda qazaqstandyq velosporttyń ótkeni men búgini týraly derekter qoıyldy. Sonymen qatar, kórmeniń ashylý saltanatynda Velosport federatsııasynyń tehnıkalyq dırektory Aleksandr Antyshev olıpıada chempıony Aleksandr Vınokýrovtyń sportshy retinde qalyptasý barysy týraly syr shertti.
«Biz Aleksandr Vınokýrov degen kim ekenin alǵash ret 1987 jyly bildik. «Qazaqstan oqýshysy» jarysynda aldyńǵy topta 12 shabandoz kele jatty. Biraq sońǵy sátte olardyń aldynda bir kishkentaı balanyń aǵyzyp kele jatqanyn baıqadym. Men ony buzaqylyq jasap júrgen bala shyǵar dep qýyp jibermek boldym. Alaıda ol qolyn kóterip, «men jeńdim» dep aıǵaılady. Sol jarysta Vınokýrov jeńiske jetti, alaıda ol negizgi toptaǵy balalardan 3 jas kishi edi. Mine, sol sátten bastap Vınokýrovtyń baǵy jandy. Qazaqstanda bolashaqta basqa da Vınokýrovtar týatynyna senemin!» - deıdi A. Antyshev.
Onyń aıtýynsha, sol kezderde velosıpedpen kóp adam jattyǵatyn.
«Bıyl 44-shi «Qazaqstan oqýshysy» jarysy ótedi. Bul jarystyń tarıhynda jalpy eseppen 6337 bala qatysty. Eń jemisti jyl 1981 jyl boldy. Onda birinshi kezeńniń sóresine 45 komandanyń 268 shabandozy shyqqan bolatyn. Budan shyǵatyn qorytyndy, san bar jerde sapa da bolady, ıaǵnı neǵurlym kóp adam sportqa qatyssa, arasynan chempıon shyǵý múmkindigi soǵyrlym kóp bolmaq», - dedi ol.
