Qazaqstan velosport quramasy Azııa chempıonatynan ekinshi altyndy enshiledi

RAIONG. QazAqparat - Taılandtyń Raıong qalasynda tasjoldaǵy velosporttan Azııa chempıonaty ótip jatyr. Búgin 23 jasqa deıingi veloshabandozdar arasynda otandasymyz Andreı Remhe máre syzyǵyn birinshi bolyp kesti, dep habarlaıdy QazAqparat.

Ol belgilengen 30 shaqyrymdy 36:11.058 sekýndta baǵyndyrdy.

Odan keıin qytaılyq Jý Tszınıan men ındonezııalyq Muhammed Endı Roıan keldi.

Birneshe kún buryn aralas komandalyq synda (mıks) Ulttyq qurama chempıon atanǵan.

Ol kezde Qazaqstan quramasy sapynda Evgenıı Fedorov, Dmıtrıı Grýzdev, Igor Chjan, Mahabbat Úmitjanova, Rınata Sultanova jáne Marına Kýzmına jarys jolyna shyqty.

Jalpy Raıongta sary qurlyqtaǵy 27 elden kelgen 700-ge jýyq veloshabandoz eresekter arasyndaǵy 42-shi, jastar arasyndaǵy 29-shy, 11-shi para Azııa chempıonatynda synǵa túsip jatyr.

Munda Parıj Olımpıadasyna qajet reıtıng upaılary sarapqa salynady. Chempıonat 13 maýsymda máresine jetedi.