Qazaqstan Vetnamnyń VietJet Air áýe kompanııasymen memorandým jasady

ASTANA. QazAqparat - VietJet Air vetnamdyq áýe kompanııasymen ózara túsinistik týraly memorandýmǵa qol qoıyldy, dep habarlaıdy QazAqparat.

QR Prezıdenti Qasym-Jomart Toqaevtyń Vetnam Sotsıalıstik Respýblıkasyna jasaǵan memlekettik saparynda elimizdiń Indýstrııa jáne ınfraqurylymdyq damý mınıstrligi men VietJet Air áýe kompanııasy ózara túsinistik týraly memorandýmǵa qol qoıǵan bolatyn.

Atalǵan qujatqa Qazaqstan tarapynan QR Indýstrııa jáne ınfraqurylymdyq damý mınıstri Marat Qarabaev, sondaı-aq Vetnam memleketiniń atynan SOVICO Group kompanııasynyń teń quryltaıshysy ári basqarma tóraǵasy, VietJet Air kompanııasynyń dırektorlar keńesi tóraǵasynyń orynbasary Ngýen Than Hýng qol qoıdy.

Bul - Qazaqstannyń avıatsııa bıligi men VietJet Air atqarǵan jumystyń jemisti nátıjesi.

Osyǵan sáıkes taraptar «ashyq aspan» rejimi sheńberinde ushý geografııasyn odan ári keńeıtip, Qazaqstan men Vetnam arasyndaǵy reısterdi ulǵaıtýǵa, sondaı-aq eki el arasynda júk tasymalyn damytýǵa kúsh salady.

Buǵan qosa jolaýshylarǵa qosymsha múmkindikter berý úshin VietJet Air qazaqstandyq avıakompanııalarmen yntymaqtastyqty nyǵaıtyp, onyń ishinde «ınterlaın» jáne «kodsher» kelisimderine qol qoıýǵa múddeli.

Joǵaryda atalǵan ýaǵdalastyq arqyly eki el týrızmdi damytyp, mádenı, sonymen birge ınvestıtsııalyq, iskerlik baılanysty arttyrýdy kózdep otyr.