Qazaqstan – Vetnam arasynda tikeleı áýe reısi ashyldy
Astanada Qazaqstan men Vetnam arasyndaǵy dıplomatııalyq qarym-qatynastyń ornaǵanyna 30 jyl tolýyna oraı saltanatty is-shara ótti.
Atalǵan shara barysynda eki el arasynda tikeleı áýe reısiniń resmı ashylýy ótti.
Osy qazannan bastap Almatydan Vetnamnyń Nıachang qalasyna alǵashqy áýe reısi ushady.
Uıymdastyrýshylardyń aıtýynsha, ushaq aptasyna eki ret qatynaıdy jáne ushý ýaqyty 9 saǵattan asady.
«Aldymen barsha qonaqqa qosh keldińizder deımin. Bıyl Qazaqstan men Vetnam memleketi arasynda resmı qarym-qatynastyń ornaǵanyna 30 jyl tolyp otyr. Búgingi shara Vetnam Sotsıalıstik Respýblıkasynyń vıtse-prezıdenti Vo Thı An Sýan hanymnyń Qazaqstanǵa sapary aıasynda uıymdastyrylyp otyr», - dedi QR Syrtqy ister mınıstriniń orynbasary Ádil Tursynov.
Qazaqstan men Vetnam arasynda qatynaıtyn «Vietjet» áýe kompanııasy bizdiń elden bólek Úndistan, Japonııa, Koreıa, Eýropa elderi jáne Aýstralııany baılanystyrady.
«Tikeleı áýe reısi Qazaqstan jáne Ortalyq Azııa elderin Vetnammen baılanystyryp ekonomıka, saýda jáne týrızm salasyndaǵy birlesken jobalardyń damýyna yqpal etedi dep sanaımyn. Vietjet áýe kompanııasy saıahattaýshy, jumys babymen, oqý jáne basqa da sebepterpen ushatyn klıentterdi tamasha qyzmetpen qamtamasyz etedi», - deıdi «Vietjet» áýe kompanııasynyń vıtse-prezıdenti, dırektorlar keńesiniń múshesi Chý Vet Kýong.
