Qazaqstan uıaly baılanys qyzmetteriniń tarıfi boıynsha álemde 37-orynda tur

NUR-SULTAN. QazAqparat – Qazaqstan uıaly baılanys qyzmetteriniń tarıfi boıynsha álemde 37-orynda tur. Bul týraly QR Tsıfrlyq damý, ınnovatsııalar jáne aeroǵarysh ónerkásibi mınıstriniń mindetin atqarýshy Ashat Orazbek aıtty, dep habarlaıdy QazAqparat tilshisi.

«Halyqaralyq elektr baılanysy odaǵy esebiniń sońǵy derekterine sáıkes, Qazaqstan baılanys qyzmetteriniń tarıftik qol jetkizýi boıynsha joǵary pozıtsııada ekenin aıta ketken jón. Atap aıtqanda, uıaly baılanys qyzmetteriniń tarıfteri boıynsha Qazaqstan 181 eldiń ishinde 37-oryndy (TMD elderi boıynsha 2-oryn), al ınternetke keń jolaqty qol jetkizý tirkelgen qyzmetteri boıynsha - 23-orynda» (TMD elderi boıynsha 2-oryn), - dep atap ótedi ol Májilis depýtattarynyń saýalyna bergen jaýabynda.

Ashat Orazbektiń atap ótýinshe, qazirgi ýaqytta Qazaqstanda ıternetke mobıldi keńjolaqty qatynaý qyzmetterin shekteýli operatorlar (nomınaldy túrde 3 operator – «Ksell» AQ (Activ/Kcell), «Mobaıl Telekom-Servıs» JShS (Altel/Tele2) jáne «Kar-Tel» JShS (Beeline/izi) kórsetedi. Biraq, is júzinde olardyń 2 menshik ıesi bar. Atap aıtqanda, naryqta 39 jáne 61 paıyzdyq úlesi bar «Kar-Tel» JShS jáne «Qazaqtelekom» AQ qyzmet usynady.

«Bul operatorlar arasyndaǵy básekelestik álsiz jáne osy jaıt kórsetiletin qyzmetterdiń sapasyna áser etedi», - dedi mınıstriniń mindetin atqarýshy.