«Qazaqstan» UTA «Jan jylýy» baǵdarlamasynyń qaıyrymdylyq kontserti ótedi
ASTANA. QazAqparat - 14 naýryz kúni saǵat 19.00-de Astanadaǵy «Qazaqstan» ortalyq kontsert zalynda «Qazaqstan» Ulttyq telearnasynyń uıymdastyrýymen «Jan jylýy» baǵdarlamasynyń efırge shyqqanyna 5 jyl tolýyna oraı qaıyrymdylyq kontserti ótedi.
Bul týraly telearnanyń baspasóz qyzmetinen habarlaıdy.
Aıta keteıik, «Jan jylýy» baǵdarlamasynyń kómegimen jetimder úıinen 20 bala jańa otbasyn tapsa, 13 bala shet elde em alyp, baspanasyz 8 otbasy jańa úıdiń kiltine ıe boldy.
Ulystyń uly kúni, naýryz - adamdardy tatýlastyratyn, qaıyrymdylyq jasaıtyn, kómekke muqtaj jandarǵa qol ushyn beretin ulyq mereke. Osy meıram qarsańynda «Qazaqstan» Ulttyq telearnasy «Jan jylýy» baǵdarlamasynyń 5 jyldyq jumysyn qorytyndylap, qaıyrymdylyq kontsertin ótkizýdi qolǵa alyp otyr.
Kontsertke atalmysh baǵdarlamanyń arqasynda ómirine úlken ózgerister engen keıipkerler qatysyp, olardyń kúrdeli taǵdyrynan syr shertetin beınekórinister kórsetiledi.
Qonaq retinde belgili qoǵam qaıratkerleri, depýtattar men múmkindigi shekteýli adamdarǵa qol ushyn sozǵan demeýshiler, BAQ ókilderi, sondaı-aq óner juldyzdary keledi. Kesh sońynda taǵy bir kómekke muqtaj búldirshinge qaıyrymdylyq kómegi kórsetilmek.
