Qazaqstan ustazdary krıterıaldy baǵalaý júıesin talqylady
ASTANA. QazAqparat - Búgin elordadaǵy «Qazmedıa» ortalyǵynda elimizdiń barlyq óńirinen jınalǵan 400-ge jýyq muǵalim «Krıterıaldy baǵalaý júıesi: tájirıbe, máseleler, keleshegi» atty respýblıkalyq semınar-trenıngke qatysty, dep habarlaıdy QazAqparat tilshisi.
2017-2018 oqý jylynyń qorytyndylaryna arnalǵan múldem jańa formattaǵy shara barysynda fasılıtatsııalanǵan sessııa, sheberlik synyptary jáne jumys toptarynyń árbir qatysýshysy bilim berý mazmunyn jańartý aıasyndaǵy ózekti máselelerdi belsendi talqylap, óz oıyn ashyq aıtýǵa múmkindik aldy. Bul rette bilim berýdiń jańa mazmunynyń jaqsylyǵymen qatar kemshilikterin de ashyq aıtýǵa úndegen Bilim jáne ǵylym vıtse-mınıstri Ashat Aımaǵambetovtiń de sózi qatysýshylarǵa erkin bolýǵa múmkindik bergendeı.
«Búgingi sizderdiń aıtqan ár sózderińiz bizder úshin óte qundy. Sondyqtan kemshilikteri bolsa ashyq aıtýlaryńyzdy suraımyn», -degen edi vıtse-mınıstr.
Semınar-trenıngke qatysqan Shyǵys Qazaqstan oblysy Aıagóz aýdandyq bilim berý mazmunyn jańartý jónindegi jetekshi mektepterdiń úılestirýshisi Nurjanat Erkinbaeva bul baǵdarlamanyń jetistikterimen qatar qıyndyǵy da bar ekenin aıtty.
«Ártúrli qıyndyqtar da týyndaýda. Qıyndyq týdyrǵan máseleler retinde balalardyń jańartylǵan bilim berýge daıyn bolmaýyn aıtýǵa bolady. Óıtkeni, osy kúnge deıin balalardyń bilimi baǵalanyp, olar baǵa úshin oqyp keldi. Al jańartylǵan bilim mazmunynda muǵalim balalardy krıterıaldy baǵalap, toqsandyq jıyntyq baǵalaýmen sáıkestendiredi», - dedi Nurjanat Erkinbaeva.
Onyń aıtýynsha, Shyǵys Qazaqstan oblysynda jańartylǵan bilim mazmunyna kóshkennen keıin óńirdegi 5-7 synyptardaǵy bilim sapasy 20 paıyzǵa ósken.
«Jalpy oblysta bilim sapasy buǵan deıin 60 paıyz bolsa, qazir 75-80 paıyzǵa artyp otyr. Sondaı-aq ata-analar tarapynan rızashylyq bar. Óıtkeni balalar úsh tilde bilim alyp jatyr», - dedi ol.
Aıta keteıik, semınar-trenıngte bilim berý mazmunyn jańartý jónindegi mektep úılestirýshileri, 5 jáne 7-synyptarda jumys isteıtin pedagogter, oblystardyń jáne Astana, Almaty qalalarynyń bilim basqarmalary basshylarynyń orynbasarlary, oblystyq, qalalyq, aýdandyq ádistemelik ortalyqtar men kabınetter basshylary, bilim bólimderiniń mamandary qatysty.
