Qazaqstan usynǵan Halyqaralyq sý uıymy sý dıplomatııasyn kúsheıtýge jol ashady — sarapshy
ASTANA. KAZINFORM — Qazaqstannyń sý dıplomatııasyndaǵy bastamasy álem nazaryn aýdardy, dep habarlaıdy Sý resýrstary jáne ırrıgatsııa mınıstrliginiń baspasóz qyzmeti.
Water Holistic halyqaralyq baǵdarlamasynyń negizin qalaýshy, «Jańa sý paradıgmasy» tujyrymdamasynyń avtory jáne qorshaǵan ortany qorǵaý salasyndaǵy halyqaralyq Goldman syılyǵynyń laýreaty doktor Mıhal Kravchık Memleket basshysy Qasym-Jomart Toqaevtyń BUU qurylymynda Halyqaralyq sý uıymyn qurý jónindegi bastamasyn joǵary baǵalady.
Sarapshynyń pikirinshe, qazirgi jaǵdaıda jahandyq sý máselelerin sheshýdi ortalyqtandyrý — asa ózekti ári qajetti qadam.
— Bul óte der kezinde kóterilgen bastama. Óıtkeni búginde álem klımattyq, ekologııalyq jáne azyq-túlik qaýipsizdigine qatysty kúrdeli syn-qaterlermen betpe-bet kelip otyr. Munda sý resýrstary sheshýshi ról atqarady. Qazaqstan usynyp otyrǵan BUU janyndaǵy Halyqaralyq sý uıymy memleketter arasyndaǵy sý qatynastaryna oń yqpal etip, tájirıbe men bilim almasýdy kúsheıtýge, sondaı-aq halyqaralyq jáne ulttyq sý zańnamasyn jetildirýge múmkindik beredi. Bolashaq pen ornyqty damý osyǵan tikeleı baılanysty. BUU júıesinde Azyq-túlik jáne aýyl sharýashylyǵy uıymy (FAO), Dúnıejúzilik densaýlyq saqtaý uıymy bar, alaıda sý máselelerimen aınalysatyn biryńǵaı halyqaralyq uıym joq. Sondyqtan Qazaqstannyń bastamasy óte ózekti ári ýaqyt talabyna saı, — dedi doktor Mıhal Kravchık.
Eske salaıyq, buǵan deıin Sý resýrstary jáne ırrıgatsııa mınıstri Nurjan Nurjigitov sheteldik jáne otandyq sarapshylarmen kezdesý ótkizgen bolatyn. Jıynda Astanada ótken Óńirlik ekologııalyq sammıt qorytyndysy boıynsha ázirlengen Qazaqstan men Ortalyq Azııanyń sý-klımattyq qaýipsizdigin qamtamasyz etýge baǵyttalǵan praktıkalyq usynymdardy iske asyrý máselesi qaraldy. Usynystarǵa sáıkes, Sý resýrstary jáne ırrıgatsııa mınıstrligi janynan Qazaqstanda shaǵyn sý aınalymdaryn júıeli túrde qalpyna keltirýge baǵyttalǵan «Jańa sý paradıgmasy» tujyrymdamasyn is júzinde júzege asyrý jónindegi jumys tobyn qurý kózdelip otyr. Sonymen qatar Kaspıı jáne Aral teńizderi alaptarynda, sondaı-aq Balqash-Alakól basseıninde topyraqtaǵy ylǵaldy saqtaý jáne jaýyn-shashyn sýyn ustap qalýǵa arnalǵan pılottyq jobalardy ázirleý sharalary usynylǵan.
— «Jańa sý paradıgmasy» tujyrymdamasy shaǵyn sý aınalymdaryn qalpyna keltirýge negizdelgen. Ókinishke qaraı, biz áli kúnge deıin jaýyn-shashyn mólsheri jer beti men topyraqtan býlanatyn ylǵalǵa táýeldi emes, al jańbyr tek muhıttardan kelgen sý esebinen qalyptasady degen túsinikten aryla almaı kelemiz. Shyn máninde, jaýyn-shashyn kólemi jer betinen bolatyn býlanýǵa tikeleı baılanysty. Buǵan ormandar, egistik alqaptar jáne tipti qalalyq orta da áser etedi. «Jańa sý paradıgmasyna» sáıkes, jańbyr sýy — tirshiliktiń negizi. Sondyqtan shaǵyn sý aınalymdaryn saqtaýǵa jetkilikti kóńil bólmesek, muhıttardan qalyptasatyn iri sý aınalymdaryna táýeldi bolyp qalamyz. Bul óz kezeginde uzaqqa sozylǵan qurǵaqshylyq kezeńderiniń jıileýine ákelýi múmkin, — dedi doktor Mıhal Kravchık.
Budan buryn Qazaqstan BUU aıasynda Halyqaralyq sý uıymyn qurýdy kózdep otyrǵanyn jazǵan edik.
