Qazaqstan úshin jańa konteınerlik kemelerdiń qurylysy bastaldy
ASTANA. KAZINFORM – Baký keme jasaý zaýytynda Qazaqstan úshin salynatyn syıymdylyǵy 780 TEU bolatyn alǵashqy mamandandyrylǵan konteınerlik kemeniń kılin qalaý rásimi ótti. Bul týraly Kólik mınıstrligi habarlady.
Joba Abu Dhabi Ports Group kompanııasymen yntymaqtastyq aıasynda júzege asyrylyp jatyr. Іs-sharaǵa Qazaqstan Kólik vıtse-mınıstri Jánibek Taıjanov qatysty.
Joba «Qazmortransflot» ulttyq teńiz keme qatynasy kompanııasy men Abu Dhabi Ports arasyndaǵy seriktestik sheńberinde iske asyrylyp jatyr. 2027 jyldyń sońyna deıin Kaspıı teńizinde konteınerlik júkterdi tasymaldaýǵa arnalǵan eki zamanaýı konteınerlik kemeni salý josparlanǵan. Jańa kemeler Qazaqstannyń konteınerlik júkterdi teńiz arqyly tasymaldaý múmkindigin keńeıtip, tasymaldardyń tıimdiligin arttyrýǵa jáne Transkaspıı halyqaralyq kólik baǵyty (Orta dáliz) boıyndaǵy elimizdiń pozıtsııasyn nyǵaıtýǵa múmkindik beredi.
Sondaı-aq is-shara barysynda «Qazaqstan temir joly» UK» AQ men Baký keme jasaý zaýytynyń birlesken jobalary talqylandy.
Eki qurǵaq júk kemesin salý jónindegi kelisimshartqa qol qoıylǵan. Qazirgi ýaqytta kemelerdiń dızaıny pysyqtalyp jatyr. Olardy tapsyrý 2028 jylǵa josparlanǵan. Otandyq saýda flotyn damytý Qazaqstannyń kólik saıasatynyń basym baǵyttarynyń biri bolyp sanalady.
Bıylǵy sáýir aıynda «Qazaqstan temir joly» UK» AQ alty kemeniń, onyń ishinde eki konteınerlik kemeniń qurylysyn salý týraly kelisim jasasty. Bul kemeler Baký keme jasaý zaýytynda qurastyrylady.
Atalǵan jobalardy iske asyrý Kaspıı óńiriniń kólik-logıstıkalyq áleýetin odan ári arttyrýǵa, júk tasymaly kólemin ulǵaıtýǵa jáne Qazaqstannyń Azııa men Eýropany baılanystyratyn mańyzdy tranzıttik hab retindegi rólin kúsheıtýge yqpal etedi.
Aıta keteıik, «Qytaı — Qazaqstan — Ózbekstan — Aýǵanstan» baǵytyndaǵy alǵashqy konteınerlik poıyz jolǵa shyqty.
