Qazaqstan ushqyshtary 2018 jyly tsıfrlyq kýálik alady
ASTANA. QazAqparat - QR IDM Azamattyq avıatsııa komıteti ushaqty basqarýǵa ruqsat beretin kýáligi bar qazaqstandyq ushqyshtardyń sanyn málim etti, dep habarlaıdy «QazAqparat» HAA tilshisi.
AAK málimetine súıensek, qazirgi ýaqytta Qazaqstanda ushqysh kýálikterine 2133 adam ıe.
«Áýe kemesin basqarýǵa 2133 ushqysh quqyly. 798 ushqyshtyń kýáligi bolǵanymen, halyqaralyq tájirıbege sáıkes ýaqytsha ushýǵa qatyspaıdy», - dep habarlady AAK.
Komıtet habarlaǵandaı, Halyqaralyq standarttar men Qazaqstan zańnamalary talaptaryna sáıkes, ushqysh kýáligi 5 jyl merzimge berilip, jyl saıyn áýe kemesin basqarý merzimi uzartylyp otyrady.
«Keı jaǵdaılarda ushqyshtar túrli sebeptermen 5 jyldyq kezeń ishinde ushqysh kýáliginiń merzimin uzarta almaı jatady. Ruqsaty joq mundaı ushqyshtardy áýe kompanııasy ushaq basqarýǵa jibermeıdi. Buǵan qosa, olar ushqysh kýáligine ıe bola tura, tıisti daıyndyqtardan ótý nátıjesinde áýe kemesin basqarýǵa qaıtadan jiberilýi múmkin», - delingen AAK habarlamasynda.
Aıta ketý kerek, QR IDM azamattyq avıatsııa komıteti kelesi jyly ushqyshtar kýáligin tsıfrlyq tasymaldaý júıesine aýystyryp, áýe qyzmetkerleriniń málimetterin avtomattandyrýdy josparlap otyr. Komıtet atalǵan shara ushý quramyn baqylaýǵa alýdy tıimdi etedi dep esepteıdi.
