Qazaqstan úshinshi modernızatsııa jaǵdaıynda tur – sarapshy
Elimizdegi modernızatsııa men júıeli reformalardy júrgizý máseleleri boıynsha taldaý jáne zertteý jumystaryn tanystyrý kezinde bul jaıly Zertteýler jáne konsaltıng (CRC) ortalyǵynyń sarapshysy Ánýar Boranbaev aıtty , dep habarlaıdy QazAqparat tilshisi.
«Biz qazirgi tańda úshinshi modernızatsııa jaǵdaıynda turmyz. Nelikten úshinshi modernızatsııa? Táýelsiz Qazaqstannyń tarıhyn saraptaıtyn bolsaq, aýqymdy eki kezeńdi qarastyrýǵa bolady. Alǵashqysy – toqsanynshy jyldar nemese alǵashqy modernızatsııa kezeńi. Ol kezdegi basty maqsat – egemendikti saqtap, Qazaqstandy álemniń kartasynda bekitip alý edi. Qalaı degenmen kez kelgen ózgeristiń ózindik qarajat kózi bolýy kerek. Sol kezeńdegi negizgi draıver – jekeshelendirý boldy», - dedi Ánýar Boranbaev.
Sarapshy toqsanynshy jyldardan bastap erkindik ýaqytymen birge eń jyldam qurylymdyq reformalardyń júzege asyrylǵanyn jetkizdi.
«1998 jylǵy azııalyq daǵdarystan keıin eki myńynshy jyldarǵa aıaq bastyq. Kómirsýtekterdiń baǵasy sol ýaqytta qymbattap, memleket aıaǵynan nyq turdy. Memlekette resýrstar paıda bolyp, modernızatsııanyń ekinshi kezeńine aıaq bastyq. Ol kezeńde eldiń damýyna basymdyq berdik, onyń negizgi draıveri retinde tabıǵı resýrstardy aıtýǵa bolady. Ekonomıkanyń sol kezdegi jyldyq ortasha ósimi aıtarlyqtaı joǵary boldy da, damýy ortasha deńgeıdegi memleketterdiń qataryna ońaı endik», - dedi Ánýar Boranbaev.
Áıtse de spıkerdiń aıtýynsha, sol kezde tańdalyp alynǵan model óz jemisin tolyǵymen berip, endigi kezekte ary qaraı ne bolady degen suraq týyndap otyr.
«Esterińizde bolsa eki myńynshy jyldardyń basynda-aq búgingi suraqtarǵa jaýap izdele bastaǵan edi. Memlekettik qujattardyń kóbi bilim ekonomıkasyn qurýǵa talpynǵanymyzdy dáleldeı túsedi. Ol maqsatpen júrsek, tabıǵı resýrstardan buryn kreatıvti bilim men adamdardyń aqyly negizgi qundylyqqa ıe bolady. Mundaı jaǵdaıda adamı kapıtaly – basty draıverge aınalýy kerek», - dep túıdi Ánýar Boranbaev.
Foto: www.matritca.kz