Qazaqstan úshin syrtqy ınflıatsııalyq jaǵdaı kúrdeli bolady – Ulttyq bank

NUR-SULTAN. QazAqparat – Bıyl Qazaqstan úshin syrtqy ınflıatsııalyq jaǵdaı anaǵurlym kúrdeli bolady. Bul týraly QR Ulttyq banki Tóraǵasynyń orynbasary Vıtalıı Týtýshkın respýblıkalyq bıýdjetti talqylaý kezinde aıtty, dep habarlaıdy QazAqparat tilshisi.

«Bıyl jyl basynan beri geosaıası jaǵdaı ýshyqqan tusta álemdik qarjy, taýar naryqtaryndaǵy jaǵdaı qubylmaly boldy. Týyndaǵan syn-qaterlerdiń saldarynan álemdik ekonomıka kútkennen de baıaý damýda», - dedi V. Týtýshkın Májilistiń jalpy otyrysynda.

Onyń aıtýynsha, halyqaralyq qarjy uıymdary álemdik ekonomıkalyq ósimge qatysty boljamyn quldyraý baǵytyna qaraı shamamen 1 paıyzdyq tarmaqqa qaıta qarady.

«Taýar jetkizý problemalarynyń kúrdelenýi jahandyq ınflıatsııalyq jaǵdaıdy nasharlatyp, álemdegi shıkizat taýarlary men azyq-túlik baǵasynyń ósýine alyp keldi. Osyǵan baılanysty Halyqaralyq valıýta qory ınflıatsııa boljamyn qaıta qarap, onyń aıtarlyqtaı joǵary deńgeıi buryn boljaǵanǵa qaraǵanda uzaq ýaqyt saqtalady dep paıymdaıdy», - dedi Ulttyq bank ókili.

Aıta keteıik, Májiliste «2022-2024 jyldarǵa arnalǵan respýblıkalyq bıýdjet týraly» QR Zańyna ózgerister men tolyqtyrýlar engizý týraly» Zań jobasy talqylanyp jatyr.