Qazaqstan úshin Qytaıdyń azyq-túlik naryǵyna shyǵý qıyndap otyr - China Center
ASTANA. QazAqparat - Qytaı Halyq Respýblıkasy usynǵan «Bir beldeý - bir jol» atty bastama Qazaqstannyń «Nurly jol» baǵdarlamasymen jaqsy úndesip ketti.
Osynyń arqasynda ortaq jobalar qolǵa alynyp, eki el arasyndaǵy saýda-sattyq kúsheıe tústi, dep habarlaıdy QazAqparat tilshisi.
Qazaq-qytaı yntymaqtastyǵy jónindegi "China Center" xalyqaralyq ortalyǵynyń bas dırektory Ádil Káýkenovtiń aıtýynsha, «Bir beldeý - bir jol» bastamasy men «Nurly jol» baǵdarlamasy úndesip turǵannan keıin ortaq jobalardyń mańyzdylyǵy artyp otyr. «Bylaısha aıtqanda, ortaq jumystyń ıdeologııalyq bir mán paıda boldy. Jumys ta jaqsy júrip ketti. Biraz máselelerdi ortaq múdde turǵysynan sheshýge múmkindik týdy. Máselen, Astanadaǵy LRT jobasynyń ózi ekijaqty yntymaqtastyqtyń bir kórinisine aınaldy. Atalǵan jobanyń qurylysyna qytaılyq kompanııa atsalysyp jatyr. Qytaıda monorelspen júretin ondaı qoǵamdyq kólikter kóp. Osy saladaǵy úlken tájirıbe qolǵa alynyp otyr», - deıdi Káýkenov.
Al iri jobalardyń ishinde Lıanıýngan portyndaǵy qazaqstandyq termınal, «Qorǵas» halyqaralyq ortalyǵy jáne taǵy basqa jobalar bar. «Buryn biz taýar alý úshin qyrǵyzdyń «Dordoıyna» kóp barsaq, búginde, ásirese, ońtústik óńirler úshin «Qorǵas» halyqaralyq ortalyǵyna barǵan tıimdi. Degenmen, Qazaqstan úshin áli kúnge deıin Qytaıdyń azyq-túlik naryǵyna shyǵý qıyn bolyp otyr. Máselen, astyqqa shekteý bar. Qazaqstanǵa beriletin kvotalar az. Otandyq taýar óndirýshileri bolsa, kvotalardyń múldem bolmaǵanyn qalaıdy. Endi, qazir et boıynsha tosqaýyldar birshama azaıyp keledi», - dep atap kórsetti Káýkenov búgin Astanada ótken «Qazaqstan - Reseı» sarapshylar forýmynda.
Aıta keteıik , sessııa kezinde Ádil Káýkenov Uly Jibek joly jobasyna qatysty birqatar mańyzdy máselelerdi de kóterdi. Al QR Tuńǵysh Prezıdentiniń qory janyndaǵy álemdik ekonomıka men saıasat ınstıtýtynyń mamany Asqar Nursha Qazaqstan men Reseı arasyndaǵy saýda-sattyqtyń tepe-teńsizdigine toqtaldy . Sondaı-aq Asqar Nursha QR Prezıdenti Nursultan Nazarbaev «Bolashaqqa baǵdar: rýhanı jańǵyrý» maqalasy arqyly Reseı Federatsııasyna keńes bergenin de jetkizd i.
Qazaqstan - Reseı sarapshylar forýmy Qazaqstannyń xalyqaralyq qatynastar keńesi, "Valdaı" pikirtalas klýby men "Parasat" júıeli zertteýler ınstıtýtynyń bastamasymen ótti.
