Qazaqstan úshin kórshiles eldermen baılanystardy nyǵaıtý basymdyqty baǵyt - Irına Chernyh
«16 qyrkúıekte Qazaqstan Prezıdenti Nursultan Nazarbaev memlekettik saparmen Ózbekstanda boldy. Sapar barysynda eki memleket arasyndaǵy qatynastardy damytý máseleleri talqylanyp, Birlesken málimdeme qabyldandy. Sonymen qatar avtomobıl jáne temir jol dálizderin damytý, kedendik baqylaý, áskerı-tehnıkalyq saladaǵy yntymaqtastyq týraly, transshekaralyq sý resýrstaryn basqarý jáne basqa da máselelerdi qamtıtyn ekijaqty qujattar bekitildi. Bul qujattardyń barlyǵy qazaq-ózbek qatynastaryn tereńdetýge baǵyttalǵany anyq. Atap aıtqanda, Qazaqstan úshin Ortalyq Azııa jáne kórshiles eldermen baılanystardy nyǵaıtý syrtqy saıasatta dástúrli túrde basymdyqty baǵyt bolyp tabylady»,-deıdi I. Chernyh «QazAqparat» agenttigine bergen suhbatynda.
Onyń sózine qaraǵanda, jańa prezıdenttiń bılikke kelýimen Ózbekstan Ortalyq Azııany óziniń syrtqy saıasatynda strategııalyq basymdyq retinde aıqyndady. Elbasynyń atalǵan sapary eki eldiń arasyndaǵy qatynastardy keńeıtýmen qatar, bizdiń yntymaqtastyqty tereńdetýge negizdelgenin baıqatyp otyr.
«Ózara belsendi is-qımyldar tek ortalyq deńgeıde ǵana emes, sonymen qatar qos memlekettiń shekaraǵa shektes oblystarynda da jańa qarqyn ala bastady. Osyǵan baılanysty eki eldiń shekaraǵa shektes óńiraralyq yntymaqtastyǵyn damytýǵa erekshe kóńil bólinip otyr. Saýda-ekonomıkalyq jáne mádenı-gýmanıtarlyq salalardaǵy Qyzylorda oblysy men Navoı oblysy, Ońtústik Qazaqtan oblysy men Tashkent, Syrdarııa oblystary arasyndaǵy ózara túsinistik týraly memorandýmdar jasaldy»,-dedi ınstıtýttyń bas ǵylymı qyzmetkeri.
Onyń paıymynsha, Qazaqstan, Ózbekstan jáne Túrikmenstan arasyndaǵy qatynastardyń damý perspektıvalary optımıstik turǵyda baǵalanady.
«Osy elderdiń arasynda qatynastardyń damýyna tyń serpin berilgenin baıqap otyrmyz. Bul óz kezeginde tıisti máselelerdi eń joǵary deńgeıde sheshýde múddelilik bar ekenin kórsetedi»,-dedi sarapshy.
Budan buryn habarlanǵandaı , 16 qyrkúıekte Tashkentke memlekettik saparmen barǵan Qazaqstan Prezıdenti Nursultan Nazarbaev Ózbekstan Prezıdenti Shavkat Mırzıeevpen shaǵyn jáne keńeıtilgen quramda kelissózder ótkizdi. Kelissózderdiń qorytyndysynda eki eldiń memleket basshylary Birlesken málimdemege qol qoıdy.
Osy sapar barysyndan Sh. Mırzıeev Qazaqstan Prezıdentin «El-jurt qurmeti» ordenimen marapattady .
Atap aıtqanda , Elbasy Tashkentke saparyn tarıhı kún dep baǵalady.
Munymen qosa, 17 qyrkúıekte Ashhabatta QR Prezıdenti Nursultan Nazarbaev pen Túrikmenstan prezıdenti Gýrbangýly Berdimuhamedov ekijaqty kezdesý ótkizdi .
