Qazaqstan úshin qarajatty eń aldymen ǵarysh salasyn damytýǵa quıǵan lázim - D. Nazarbaeva
ASTANA. QazAqparat - Qazaqstan úshin qarajatty eń aldymen ǵarysh salasyn damytýǵa quıǵan lázim. Búgin Parlament Májilisinde ótken «Qazaqstan Respýblıkasynyń Ǵarysh salasyn qurý barysy» atty taqyryptaǵy Úkimet saǵatynda palata Tóraǵasynyń orynbasary Darıǵa Nazarbaeva osylaı málimdedi.
«Álbette, búgingi tańda Qazaqstannyń ǵarysh salasynda problemalar da, qaterler de az emes. Osal tustary da jeterlik. Degenmen, bizdiń qazaqstandyq ǵaryshtyq ǵylym salasyna bar-joǵy 7 jyl ǵana ekenin, ıaǵnı Ulttyq ǵarysh agenttiginiń qurylǵanyna 7 jyl tolǵanyn umytpaıyq. Sondyqtan da, salmaqty ǵylymı eńbekter men usynystar bolýy úshin jańa býyndy ǵalymdardyń jetilýine de ondaǵan jyldar ótýi kerek te tárizdi. Sonda ǵana bizdiń ǵaryshtyq sala álemniń jetekshi salasyna aınala alar edi, al buǵan da alǵysharttar barshylyq», - dedi Darıǵa Nazarbaeva. Osyǵan oraı, vıtse-spıker Qazaqstan úshin qarajatty eń aldymen ǵarysh salasyn damytýǵa quıý kerektigin aıta kele, búgingi tańda ınnovatsııaǵa da, ǵylym salasyna da salynatyn qarajattar da az emes ekenin, degenmen olardyń nátıjeliligi tıisti deńgeıde emestigin alǵa tartty. «Alaıda, túrli baǵyttaǵy ǵylymı izdenisterge jumsalǵan ondaı qarajattyń qandaı nátıje ákelip jatqanyn eshkim naqty aıtyp bere almaıdy. Eger ınnovatsııalyq, ǵylymı zertteýlerdi tolyǵymen saralasaq, onyń nátıjesin taldap, keıinnen resýrstardy eń aldymen qajetti tusqa qaıta baǵyttasaq, onda bunyń tıimdiligi de aıtarlyqtaı joǵary bolar edi. Árıne, ǵarysh salasy úshin qarajat qashanda jetkiliksiz. Sondyqtan da, biz bıýdjettik qarajattardy jumsaýdy tıimdilikke baǵyttap, shyǵyndardy ońtaılandyrýdy usynar edik», - dedi D. Nazarbaeva.
