Qazaqstan úshin Eýrazııalyq ekonomıkalyq odaq aıasyndaǵy ıntegratsııa qanshalyqty tıimdi

ASTANA. QazAqparat – Dál qazirgi jaǵdaıda Eýrazııalyq ekonomıkalyq odaq aıasyndaǵy ıntegratsııa biz úshin tıimdi. Muny Jibek Joly telearnasyndaǵy «JJ Talk» baǵdarlamasyna qatysqan Qazaqstan qoǵamdyq damý ınstıtýtynyń basqarma tóraǵasy Nurbek Matjanı aıtty, dep habarlaıdy QazAqparat tilshisi.

«Ol tek Eýrazııalyq ekonomıkalyq odaq sheńberindegi másele emes. Búkil álem boıynsha osyndaı odaqtardyń ishinde bir-birimen tereń jaqyndasýǵa nıetti elder bolady. Bul jerde másele bizge qatysty. Prezıdentimiz aıtty: «Bizge osy deńgeıdegi ıntegratsııa jetedi, biz ıadrolyq qarýdan da bas tartqanbyz», - dep. Bul oıdy asqan sheberlikpen jetkizdi. Shynyn aıtý kerek, dál qazirgi geosaıası jaǵdaıda Memleket basshysynyń emotsııaǵa berilmeı, astarlap, biraq dál aıtýy – óte oryndy. Prezıdenttiń baspasóz hatshysy da elimiz qandaı da bir elmen odaqtasýǵa nıetti emes ekenin shegelep jetkizdi, ıaǵnı bizdiń Reseı men Belarýs sııaqty tereń ıntegratsııaǵa barýymyz ekitalaı», - dedi Nurbek Matjanı.

Sonymen birge, ol «Eýrazııalyq ekonomıkalyq odaqtan shyǵý nemese qalyptasqan baılanystardy odan damyta túsý qajet pe?» degen saýalǵa qatysty óz paıymyn jetkizdi.

«Kez kelgen el osyndaı odaqqa kirgen kezde keıbir ýaqyttarda quldyraý bolady. Degenmen, basqa salalardan utyp jatýy múmkin. Sondyqtan, biz Eýrazııalyq ekonomıkalyq odaqtan qansha utamyz? Osynyń esebin shyǵarsaq, onda odaqtyń tıimdi nemese tıimsiz ekeni belgili bolady. Osy odaq aınalasyndaǵy máselelerdi zerttep júrgen adamdardyń sózinshe, dál qazirgi jaǵdaıda ol biz úshin tıimdi», - dep sózin túıindedi Nurbek Matjanı.