Qazaqstan úshin bıyl syrtqy ınflıatsııalyq jaǵdaı qolaısyz bolady

NUR-SULTAN. QazAqparat – Qazaqstanda iskerlik belsendilik ındeksi teris kórsetkishke aýysty jáne jyl boıy syrtqy ınflıatsııalyq jaǵdaı da qolaısyz bolady. Bul týraly QR Ulttyq bankiniń tóraǵasy Ǵalymjan Pirmatov aıtty, dep habarlaıdy QazAqparat tilshisi.

«Qazaqstanda iskerlik belsendilik ındeksi naýryzda teris kórsetkishke aýysyp, 48,3 boldy. Reseı Federatsııasyna qarsy sanktsııalarǵa baılanysty logıstıkalyq problemalar sebebinen shıkizat pen materıaldardyń baǵasy ósti. Ýkraına men Reseı Federatsııasy arasyndaǵy qaqtyǵys pen eksport kóleminiń qysqarýynan naýryzda ósimdik maıy jáne dándi daqyldar baǵasynyń rekordtyq ósýi FAO azyq-túlik baǵalary ındeksiniń 1990 jyldan bergi eń joǵary deńgeıine alyp keldi», - dedi Ǵ. Pirmatov Úkimet otyrysynda.

Spıkerdiń aıtýynsha, shıkizat, janar-jaǵar maı jáne gazdyń qymbattaýynan Eýroaımaqtaǵy ınflıatsııa naýryzda aldyn ala derekter boıynsha 7,9%-ǵa deıin ósti, AQSh-ta – aqpanda 40 jyldaǵy eń joǵary kórsetkishke jetip, 7,9% boldy. Reseıde ınflıatsııa naýryzda 16,7%-ǵa deıin jedeldedi.

«Qazaqstan úshin bıyl syrtqy ınflıatsııalyq jaǵdaı qolaısyz bolady, bul taýar jetkizilimi problemalarynyń saqtalýyna, azyq-túlik pen shıkizat baǵasynyń ósýine, teńge baǵamynyń álsireýine jáne geosaıası táýekelderge baılanysty. Proınflıatsııalyq táýekelderdiń kúsheıýin eskere otyryp, damyǵan elder, atap aıtqanda AQSh aqsha-kredıt saıasatyn jedel kúsheıtýge kóship jatyr», - dep atap ótti Ulttyq bank basshysy.

Aıta keteıik, Qazaqstanda ınflıatsııa sońǵy alty jylda birinshi ret 12% deıin kóterildi. Azyq-túlik taýarlary ınflıatsııaǵa eń kóp úles qosqan, olardyń ósimi 10%-dan 15,4%-ǵa deıin jedeldedi.

Sonymen birge, teńge baǵamy naýryzdaǵy qubylmaly jaǵdaıdan keıin nyǵaıyp keledi.