Qazaqstan úshin Ázerbaıjanmen baılanys Kaspıı ıntegratsııasy turǵysynan mańyzdy – saıasattanýshy
Sarapshy QazAqparat tilshisine telefon arqyly bergen suhbatynda Prezıdenttiń Bakýge jasaǵan sapary eki eldiń yntymaǵyn jańa deńgeıge kóteretinin atap ótti.
«Qazaqstan úshin Ázerbaıjanmen baılanys birinshi kezekte Kaspıı arqyly ara qatynas turǵysynan mańyzdy. Shilde sońynda bizdiń eldiń dıplomattary Bakýde Qazaqstan-Ázerbaıjan-Túrkııa baǵytyndaǵy júk tasymalyn damytý týraly kezdesýge qatysyp qaıtty. Qazaqstan men Ázerbaıjan arasynda munaı qubyry men temirjol bólikteri sııaqty asa mańyzdy ónimder boıynsha saýda jaqsy jolǵa qoıylǵan. Bul saýda-sattyqtyń ekonomıkalyq effektisi áserli», - deıdi saıasattaný ǵylymdarynyń magıstranty.
Onyń paıymynsha, Ázerbaıjan men Qazaqstannyń yntymaǵy saıası turǵydan da mańyzdy.
«Keıingi kezde álemde bolyp jatqan geosaıası oqıǵalardyń áseri de eki aradaǵy baılanystyń serpinmen damýyna jol ashýy múmkin.
Qazir keıbir sarapshylar Qazaqstan munaıyn Mańǵystaý nemese Atyraý oblysynan Kaspıı arqyly tikeleı Ázerbaıjanǵa jetkizip, ári qaraı jyljytýǵa bolatynyn kóbirek aıtyp júr. Shynymen de eki ortaǵa tikeleı qubyr salynsa, kóptegen ózara usynystar paıda bolar edi. Ázerbaıjan men Qazaqstan arasynda qatynaıtyn tankerlerdiń sany óte az. Prezıdenttiń búgingi saparynan keıin aradaǵy tankerlerdiń sany kóbeıetin shyǵar dep topshylap otyrmyn. ıAǵnı, Ázerbaıjanmen tikeleı baılanys munaı tasymalynyń jańa marshrýtyn ǵana emes, ony satyp alýshylardyń jańa qataryn shyǵarýy múmkin», - dedi Ǵazız Dáýren.
Sondaı-aq, ol eki eldiń derbes memleketter retindegi 30 jyldyq qarym-qatynasy tamyryn tereńnen alyp jatqanyna toqtaldy.
«27 tamyzda Qazaqstan-Ázerbaıjan arasyndaǵy dıplomatııalyq qarym-qatynastyń ornyqqanyna 30 jyl tolady. Keshe ǵana Ázerbaıjanda Qazaqstan dıplomatııalyq keńesiniń jıyny ótti. Osynyń bári baýyrlas elderdiń qarym-qatynasyn damytýǵa keńirek jol ashady», - dedi saıasattanýshy.
Aıta keteıik, búgin Memleket basshysy Qasym-Jomart Toqaev resmı saparmen Ázerbaıjanǵa bardy.
Sapar aıasynda Qasym-Jomart Toqaev Ázerbaıjan Prezıdentin «Altyn Qyran» ordenimen marapattady.
