Qazaqstan Úrimjidegi «Silk Road Culture Night» keshine qatysty

BEIJІŃ-ÚRІMJІ. QazAqparat - Qytaı ǵylym akademııasynyń janyndaǵy Shyńjań ekologııa jáne geografııa ınstıtýtynyń 16 qazaqstandyq doktoranty men magıstranty «Silk Road Culture Night» keshine qatysty, dep habarlaıdy «QazAqparat» HAA-nyń Qytaıdaǵy menshikti tilshisi.

Olar Qazaqstannyń mádenıetin, tarıhyn, geografııasyn jáne týrıstik áleýetin tanystyrdy. Kesh qonaqtaryna qazaqtyń dombyrasynan týǵan tamyljyǵan kúıler, halqymyzdyń ulttyq kıimderi, et, baýyrsaq, qymyz, shubat sekildi taǵamdary tartyldy.

Shara uıymdastyrýshylarynyń biri Tsıao Tszıanfan Qazaqstan-Qytaı qarym-qatynastarynyń qarqynmen damyp kele jatqanyn, ásirese Qazaqstan Respýblıkasy men QHR Shyńjań-Uıǵyr avtonomııalyq ólkesi arasyndaǵy saýda-ekonomıkalyq jáne mádenı-gýmanıtarlyq baılanystardyń jańa satyǵa kóterilgenin tilge tıek etti.
 

«2016 jyly bizdiń ınstıtýt Qazaqstannan kelgen stýdentter úshin rekordtyq mólsherdegi granttardy bóldi. Instıtýtymyzdaǵy qazaqstandyq jastardyń sany jyldan-jylǵa arta beredi dep úmittenemin», - dedi ol.

Sharaǵa Qazaqstannan tys, Qyrǵyzstan, Ózbekstan, Tájikstan, Qytaı, Germanııa, Úndistan, Pákistan, Mysyr, Rýanda, Efıopııa jáne Nıgerııadan uzyn sany 100-den astam adam qatysty.

Uıymdastyrýshylar «Silk Road Culture Night» keshin jyl saıyn ótkizýge bel býyp otyr.