Qazaqstan ýranyn Fınlıandııa atom stansalaryna jetkizý múmkindigi talqylanady

ASTANA. KAZINFORM – Atom energetıkasy jónindegi agenttik tóraǵasy Almasadam Sátqalıev Qazaqstan ýranyn Fınlıandııa atom stansalaryna jetkizý múmkindigi týraly aıtty.

– Fınlıandııa atom energııasyn beıbit paıdalaný turǵysynda shyn máninde álemdik kóshbasshylardyń biri sanalady. Ol – ıadrolyq tehnologııalardy úzdik paıdalanýshylardyń biri, ǵylymı-tehnıkalyq zertteýler boıynsha kóshbasshy. Jáne de Fınlıandııanyń retteýshilik bazasy etalon sanalady. Muny MAGATE de atap ótedi, - dedi agenttik basshysy Aqordada BAQ ókilderiniń saýalyna oraı. 

Onyń atap ótýinshe, Fınlıandııa prezıdenti Aleksandr Stýbbtyń elimizge resmı sapary aıasynda Qazaqstan men Fınlıandııa arasynda tıisti kelisimge qol qoıyp, elimiz fın tájirbıesin zerdeleıdi. 

– Fın zańnamasy – ýrandy óndirý, ýran qondyrǵylaryn basqarý, paıdalaný máselesin eń qatań retteýshilerdiń biri. Bul tájirıbeniń qyzyqty ekeni sózsiz. Biz maǵlumat almasýǵa, Qazaqstan standarttary aldyńǵy qatarly elderdegi sońǵy ázirlemelerge saı kelýi úshin zańamaǵa birlesip tekserý júrgizýge ýaǵdalastyq, - dedi Almasadam Sátqalıev. 

Sonymen qatar ol Qazaqstan ýranyn Fınlıandııa atom stansalaryna jetkizý múmkindigi talqylanatynyn aıtty.

– Qazaqstan barlyq ýaqytta da halyqaralyq naryǵyn ulǵaıtýǵa múddeli. Sondyqtan seriktesterimizge Qazaqstan ýranyn satyp alý múmkindigin qarastyrýdy usynamyz. Buǵan deıin de usynǵan edik. Olar joǵary qyzyǵýshylyq tanytyp otyr. Bul sapar mundaı jetkizilim múmkindigi men kólemine qatysty is júzinde kelissóz júrgizýge tamasha múmkindik sanalady, - dedi Almasadam Sátqalıev.