Qazaqstan ýran ótkizý úshin jańa naryqtar izdeý úrdisinde birneshe eldermen kelissózder júrgizýde
ASTANA. Mamyrdyń 19-y. QazAqparat /Marlan Jıembaı/ - Qazaqstan ýran ótkizý úshin jańa naryqtar izdeý úrdisinde birneshe eldermen kelissózder júrgizýde, deıdi QR Indýstrııa jáne jańa tehnologııalar mınıstrligi Atom energetıkasy komıtetiniń tóraǵasy Tımýr Jantıkın.
Ol bul týraly búgin Astanadaǵy «Atom energetıkasy jáne ónerkásibi» - «QazAtomEkspo-2010» birinshi qazaqstandyq halyqaralyq forýmy aıasynda ótkizilgen baspasóz máslıhatynda aıtty.
Qazirgi ýaqytta tómen óńdelgen ýran ónimderi eksportqa shyǵarylyp kelgenin aıtqan ol «Óskemendegi zaýyttyń otyny Reseı Federatsııasyna ótkizilip keldi, alaıda sońǵy ýaqyttarda tapsyrys tómendep, zaýyt is-júzinde jumys isteýdi toqtatý aldynda. Sondyqtan biz ónim ótkizetin jańa naryqtar izdestirýdemiz», deıdi T. Jantıkın.
Onyń atap ótýinshe, alǵashqy kezektegi jańa ótkizý naryǵy atom energetıkasy sektory damyǵan batys elderi bolmaq. Bul oraıda komıtet tóraǵasy «eger Qazaqstan atom ónerkásibin damytqysy kelse, qazirgi jetistikke maldanbaı, jańa ótkizý naryǵyn izdestirý qajet» degen oıyn alǵa tartady. Degenmen, bul baǵyttaǵy jumystardy birneshe jyldan beri «Qazatomónerkásip» kompanııasy júrgizýde.
T.Jantıkınniń aqparattaryna qaraǵanda, qazirgi ýaqytta Japonııamen kelissózder úrdisi qarqyndy júrgizilýde. Máselen, atom energııasyn beıbit maqsatqa paıdalaný týraly kelisimge qol qoıylyp, endi bekitý protsedýralary qalǵan. Úndistan, Kanada, QHR memlekettermen kelisimge qol qoıý kezekte tur. Sondaı-aq Qazaqstan Ońtústik Koreıa, AQSh, Erýoodaq elderimen jumys isteýde. Jetkizý aýqymynyń úlken ekendigin alǵa tartqan onyń aıtýynsha, qazaqstandyq ýran kásipornynyń barynsha óńdelgen ónimdi jetkizýge tolyq qabileti jetedi.
