Qazaqstan ýran eksporttaýdyń Reseıden tys balama jolyn tapty

ASTANA. QazAqparat – Elimiz ýran satý jáne shetelge jóneltýde Reseı aýmaǵynsyz júzege asyrý jolyn qarastyryp jatyr. Bul týraly «Qazatomónerkásip» AQ basqarma tóraǵasy Erjan Muqanov málim etti, dep habarlaıdy QazAqparat tilshisi.

«Biz Reseıge qarsy sanktsııa áseri boıynsha taldaý jasap otyramyz. Ýkraınadaǵy geosaıası jaǵdaı naryqtaǵy ýran baǵasynyń jáne ulttyq valıýtanyń aıyrbas baǵamynyń aıtarlyqtaı qubylýyna ákeldi. Degenmen búginge deıin Reseıge salynǵan sanktsııalar ýran satý men tasymaldaý qyzmetine aıtarlyqtaı áser etken joq. Geosaıası jaǵdaıdy eskere otyryp, logıstıkaǵa basa nazar aýdaramyz. Osy oraıda Sankt-Peterbýrg porty arqyly ótetin bizdiń negizgi marshrýtymyzdyń shtattyq rejımde jumys istep turǵanyn eske salamyz», - dedi Erjan Muqanov kompanııada ótken baspasóz máslıhatynda.

Kompanııa basshysynyń aıtýynsha, ónimdi jetkizýde eshqandaı shekteýler joq.

«Soǵan qaramastan bizdiń kompanııa Reseı Federatsııasynyń aýmaǵynan tys ótetin jáne 2018 jyldan beri tabysty paıdalanyp kele jatqan balama Transkaspıı halyqaralyq kólik baǵytyna kóshý boıynsha shara qabyldandy. Bul Batys konverterlerindegi operatsııalardy júzege asyrýǵa, sondaı-aq Batys konversııalyq kásiporyndary klıentteri aldyndaǵy mindetterimizdi oryndaýǵa múmkindik beredi», - deıdi ol.

Ýran eksporttaý Transkaspıı halyqaralyq kólik baǵyty arqyly júzege asatynyn kompanııanyń kommertsııa jónindegi dırektory da rastady.

«Biz ulttyq operator retinde bul baǵytta eshqandaı problema joq ekenin rastaı alamyz. Atalǵan baǵyt arqyly búkil josparlanǵan jóneltilim bıyl kúzde 100 paıyz oryndalýy kerek», - dep tolyqtyrdy Dastan Kósherbaev brıfıng barysynda.