Qazaqstan ýran boıynsha AQSh sheshimin qoldaıdy

NUR-SULTAN. QazAqparat – Qazaqstan tarapy AQSh Prezıdenti Donald Tramptyń ýran ımportyna saýda shekteýlerin engizýden bas tartý sheshimin qoldaıtyndyqtaryn jetkizdi. Atalǵan shekteý týraly bastamany AQSh Saýda mınıstrligi kótergen bolatyn, dep habarlaıdy QazAqparat QR Energetıka mınıstrliginiń baspasóz qyzmetine silteme jaap habarlaıdy.

Qazaqstan men AQSh arasynda energetıkalyq sektor boıynsha uzaq ári tabysty yntymaqtastyq ornaǵan. Osy oraıda bul baılanystar strategııalyq seriktestik deńgeıine deıin jetti.

Ekijaqty qatynastardy nyǵaıtýdyń sátti tetikteriniń biri retinde Energetıkalyq áriptestik jónindegi birlesken komıssııa sanalady. Onyń aıasynda ıadrolyq qaýipsizdik, atom ónerkásibi, munaı jáne gaz, jańaratyn energııa kózderi men energetıkany damytý salalaryndaǵy yntymaqtastyq talqylanýda.

Qazaqstan atom ónerkásibi men ıadrolyq qarýdy taratpaý rejımin nyǵaıtýda ekijaqty yntymaqtastyqty damytýǵa aıryqsha mán berip keledi.

Ekijaqty komıssııalar, ótkizilgen sharalar, sondaı-aq energetıka, syrtqy ister jáne ulttyq ekonomıka mınıstrlikteri ókilderiniń kezdesýleri aıasynda Qazaqstannyń ulttyq múddelerin qorǵaý men ýran ımportyna sanktsııalar qoldanýdy boldyrmaý boıynsha tıisti jumystar atqaryldy.

Qazaqstan Respýblıkasy ýran óndirisinde kóshbasshy sanalady jáne álem boıynsha AES-terdiń toqtaýyz jumysyna kepilgerlerdiń biri bolyp otyr. Elimizde ýran óndirý tehnologııasy MAGATE tarapynan eń ekologııalyq ári qaýipsiz tásil retinde moıyndaldy.

2015 jyly Qazaqstannan AQSh-qa tabıǵı ýran eksporty 1153,5 tonnany, 2016 jyly 1813 tonnany qurady. 2017jyly bul kórsetkish 948 tonna bolyp, eksporttyń jalpy kóleminen (23 258 tonna) 4,1 paıyzdy qamtydy. Al 2018 jyly 399,8 tonna deńgeıinde tirkelip, eksporttyń jalpy kóleminde (20 452 tonna)1,95 paıyzdy qurady.