Qazaqstan UOS ardagerlerine beriletin tólem boıynsha kósh bastap tur
ASTANA.KAZINFORM - Memleket Jeńistiń 81 jyldyǵy qarsańynda fashızmdi jeńýge baǵa jetpes úles qosqan azamattardy materıaldyq turǵyda qoldaý dástúrin jalǵastyryp keledi.
Bıyl 32,9 myńǵa jýyq adamǵa (onyń ishinde tyl eńbekkerlerine, qaza tapqandardyń jesirlerine, jaralaný, mertigý saldarynan múgedektik alǵan adamdarǵa jáne t.b.) birjolǵy tólemge 3,3 mlrd teńgeden astam qarajat bólindi.
Búginde Qazaqstanda 57 UOS ardageri turady, olarǵa erekshe kóńil bólinip keledi. Árqaısysyna, turǵylyqty óńirine qaramastan, 5 mln teńgeden tólendi.
Ardagerlerdi materıaldyq qoldaý deńgeıi boıynsha Qazaqstan basqa elderdiń kórsetkishinen edáýir asatyn tólemderdi belgileı otyryp, jetekshi oryndardyń birin alyp otyr.
2026 jyly respýblıkada maıdangerlerge birjolǵy kómek 5 mln teńgege jetti. Al Ózbekstanda osyndaı tólem 30 mln sým (shamamen 1,1 mln teńge), al Belarýste – 5 myń Belarýs rýblimen (shamamen 715-825 myń teńge) boldy. Reseı Federatsııasynda 10 myń rýbl (shamamen 61 myń teńge). Elde federaldy tólemnen basqa, aımaqtyq járdemaqylar qarastyrylǵan (mysaly, Máskeý men Máskeý oblysynda – 70 myń rýblge deıin (shamamen 430 myń teńge). Biraq bul qosymsha tólemderdi eskere otyryp, kómektiń jalpy kólemi qazaqstandyq kórsetkishten birneshe ese tómen bolyp qalady.
Bul qazaqstandyq ardagerlerdiń aıryqsha mártebesin rastaıdy jáne olardy áleýmettik qorǵaý jónindegi memlekettik saıasattyń júıeli sıpatyn kórsetedi.
Qarjylaı qoldaýdan basqa, merekede dástúrli túrde ár ardagerge jeke kóńil bólinip, qurmet kórsetiledi.
Prezıdent Qasym-Jomart Toqaev birneshe ret atap ótkendeı, memleket adaldyq pen batyldyqtyń shynaıy úlgisin kórsetken batyrlardyń esimin qurmetteıdi.
Ardagerlerge qamqorlyq jasaý – Qazaqstandaǵy memlekettik saıasattyń negizgi basym baǵyttarynyń biri. Bul jumys ortalyq jáne jergilikti deńgeıde keshendi túrde júzege asyrylyp keledi.
