Qazaqstan UOK prezıdenti Regbı federatsııasynyń basshysymen kezdesti
ASTANA. KAZINFORM – Qazaqstan Ulttyq Olımpıadalyq komıtetiniń prezıdenti Gennadıı Golovkın Qazaqstan Rugby Qazaqstan sport federatsııalary qaýymdastyǵynyń basshysy Qanat Sharlapaevpen kezdesti. Bul týraly UOK habarlady.
Gennadıı Golovkın Qanat Sharlapaevty uıym prezıdenti retinde saılanýymen quttyqtady.
Kezdesý barysynda taraptar yntymaqtastyqty nyǵaıtý jáne Qazaqstanda olımpıadalyq regbı-7 sport túrin damytý máselelerin talqylady. Ásirese, ulttyq quramanyń 2026 jyly ótetin Azııa oıyndaryna jáne 2028 jylǵy Olımpıada oıyndaryna daıyndyǵy, sondaı-aq sheteldik uıymdarmen halyqaralyq baılanysty keńeıtý jáne tájirıbe almasý máselelerine erekshe nazar aýdaryldy.
Qanat Sharlapaev komandalyq sport túrlerin damytýdyń mańyzdylyǵyn jáne Qazaqstanda olımpıadalyq qozǵalysty ilgeriletý boıynsha jumysty jandandyrý qajettigin atap ótti.
– Men qazirgi jaǵdaıdy muqııat zerttedim jáne Qazaqstan quramasynyń Azııa qurlyǵyndaǵy kóshbasshylardyń qataryna oralýy úshin naqty sheshim joldaryn belgilep qoıdym, - dedi Qazaqstan Rugby prezıdenti.
Golovkın sóz kezeginde halyqaralyq jáne óńirlik federatsııalarmen yntymaqtastyqty kúsheıtýdiń mańyzdylyǵyn atap ótip, buǵan deıin Qazaqstan Rugby bas hatshysy Aıgúl Jartybaeva Asia Rugby Atqarýshy komıtetiniń quramyna engenin tilge tıek etti.
– Halyqaralyq sport federatsııalarymen jumys tájirıbe almasýǵa, birlesken bastamalardy júzege asyrýǵa jáne Qazaqstannyń jahandyq sport qaýymdastyǵyndaǵy ımıdjin nyǵaıtýǵa jańa múmkindikter ashady. Sizderdiń aldaǵy jumystaryńyzǵa sáttilik tileımin, - dedi Qazaqstan UOK basshysy.
Kezdesý sońynda taraptar yntymaqtastyqty jalǵastyrýǵa jáne ony odan ári keńeıtýge qyzyǵýshylyǵyn bildirdi.