El quramasy Olımpıadaǵa qazaqstandyq shokoladtyń arnaıy shyǵarylǵan partııasyn ala ketedi
ASTANA. KAZINFORM — Parıjdegi Olımpıada oıyndarynyń qarsańynda Qazaqstan Ulttyq olımpıadalyq komıteti men otandyq kondıterlik fabrıka biregeı kollaboratsııa jasady.
QR Ulttyq olımpıadalyq komıtetiniń baspasóz qyzmeti atap ótkendeı, seriktestik aıasynda áıgili qazaqstandyq shokoladtyń shekteýli partııasy shyǵaryldy. Kondıterlik ónimniń qaptamasy Parıjdegi Olımpıada oıyndaryna oraı sport taqyrybyndaǵy ózindik dızaınmen árlengen.
«Biz úshin sportshylarymyzdy barlyq iri jarysta qoldaýdan bólek, elimizdiń mádenıeti men qonaqjaılylyǵyn álemge dáripteý de mańyzdy. Atletterimiz jarysta únemi ózimen alyp júretin dástúrli syılyq — qazaqstandyq shokolad Olımpıada qarsańynda arnaıy jańa qaptamaǵa oraldy. Bizdiń «Baıan Sulý» kondıterlik fabrıkasymen birlese jasaǵan bul kollaboratsııamyz ulttyq brendimizdi halyqaralyq alańda tanytyp qana qoımaı, ózge eldermen dostyq qarym-qatynasty nyǵaıtaryna da senimdimin. Óıtkeni, Olımpıada oıyndary eń aldymen bar álemdi biriktiretin alań», - dedi Qazaqstan UOK bas hatshysy Janar Ýtesheva.
«Olımpıadalyq» shokoladtyń arnaıy partııasy el quramasymen birge Parıjge attanady. Sporttyq delegatsııa ókilderi shokoladty ózge el qatysýshylarymen bólisý arqyly olarǵa áıgili qazaq qonaqjaılylyǵynyń bir bóligin kórsetpek.
Fabrıka ulttyq óndirýshi retinde sport, salaýatty ómir salty, otbasy ınstıtýty, otbasylyq qundylyqtar men ózin-ózi jetildirý jáne rýhanı damýdy qoldaıdy.
Shekteýli olımpıadalyq kollektsııa Parıjdegi jazǵy Olımpıada oıyndaryna qatysatyn bizdiń sportshylarymyzdy qoldaý sımvoly bolmaq», - deıdi «Baıan Sulý» AQ basqarma basshysy ári prezıdenti Tımýr Sadyqov.
Aıta ketelik, «Olımpıadalyq» shokolad Qazaqstan dúkenderinde satylady. Bul elimizdegi árbir turǵynnyń sportshylardy qoldaýyna múmkindik beredi.
Esterińizge sala keteıik, Qazaqstan quramasy Olımpıada oıyndaryna sporttyń 25 túrinen 80 joldama jeńip aldy. Naqtyraq aıtsaq, boks, dzıýdo, sportttyq gımnastıka, jeńil atletıka, baıdarka men kanoede esý, oqpen atý, semserlesý, grek-rım kúresi, erkin kúres, sadaq atý, stendtik atý, tennıs, veloshosse, júzý, zamanaýı bessaıys, taekvondo, velotrek, batýt gımnastıkasy, badmınton, akademııalyq esý, kórkem gımnastıka, trıatlon, ústel tennısi, quzǵa shyǵý jáne breıkıngten Olımpıada oıyndarynda synǵa túsedi.
Frantsııa astanasy Parıj qalasynda ótetin XXXIII jazǵy Olımpıada oıyndary 26 shilde men 11 tamyz aralyǵynda ótedi. Oıyndarǵa álemniń 205 elinen 10 500 sportshy qatysady dep josparlanǵan. Onda 32 sport túrinen 329 medal jıyntyǵy sarapqa salynady.
