Qazaqstan UOK Eco Athlete jobasy aıasynda úshinshi ekologııalyq aktsııasyn ótkizdi
ASTANA. KAZINFORM — Bıoalýantúrliliktiń halyqaralyq kúnine oraı QR Ulttyq Olımpıadalyq komıteti Eco Athlete jobasy aıasynda úshinshi ekologııalyq aktsııa uıymdastyrdy.
Vedomstvonyń baspasóz qyzmeti málim etkendeı, is-shara Astanadaǵy № 10 mamandandyrylǵan balalar men jasóspirimderdiń shaıbaly hokkeı sport mektebinde ótti. Aktsııaǵa mektep oqýshylary, jattyqtyrýshylar jáne Eco Athlete jobasynyń ambassadory, hokkeıden Qazaqstan quramasynyń qorǵaýshysy Ádil Beketaev qatysty.
Kezdesýdiń negizgi taqyryby — sporttaǵy ekologııalyq jaýapkershilik, sondaı-aq, sporttyq jabdyqtardy qaıta paıdalaný men qaıta óńdeýdiń mańyzy boldy. Qatysýshylarǵa toqyma qaldyqtarynyń qorshaǵan ortaǵa tıgizetin áseri túsindirilip, sporttyq kıimder men quraldardy ekinshi ret qoldaný tabıǵatqa túsetin salmaqty azaıtýǵa kómektesetini aıtyldy.
Tanymdyq bólim barysynda oqýshylar arnaıy ekologııalyq vıktorınaǵa qatysty. Suraqtar materıaldardy qaıta óńdeý, muz arenalarynda sýdy tıimdi paıdalaný jáne hokkeı jabdyqtaryn kádege jaratý taqyryptaryn qamtydy. Belsendilik tanytqan qatysýshylarǵa QR UOK atynan estelik syılyqtar tabystaldy.
Shara barysynda LS Astana qaıta óńdeý zaýyty dırektorynyń orynbasary Gúlıaıhan Tóleýbaeva sóz sóılep, Qazaqstandaǵy qaldyqtardy qaıta óńdeý júıesi men materıaldardy qaıta qoldaný tájirıbesi týraly aıtty. Sondaı-aq qazirgi tańda zattarǵa ekinshi ómir syılaýdyń mańyzyna toqtaldy.
Eco-Talk alańynda Ádil Beketaev óziniń ekologııalyq ádetterimen bólisip, sportshylardyń qorshaǵan ortany qorǵaýǵa qalaı úles qosa alatynyn áńgimeledi.
Іs-sharanyń tájirıbelik bóligi jas dızaıner Aıylajar Qaıyrǵazynyń jetekshiligimen ótken Custom Hockey Style sheberlik sabaǵy formatynda uıymdastyryldy. Oqýshylar buryn qoldanylmaı qalǵan eski oıyn jeıdeleri men hokkeı taıaqshalaryn jańartyp, sporttyq buıymdarǵa jańa ómir syılady. Ekologııalyq boıaýlar, trafaretter jáne Eco Athlete jobasynyń sımvolıkasy arqyly qatysýshylar ózderiniń erekshe dızaındaryn jasady.
Sonymen qatar Ádil Beketaev bezendirgen arnaıy jeıde de tanystyryldy. Keıin bul sporttyq forma qaıyrymdylyq maqsatynda tabystalmaq.
— Búginde sport tek jetistikke jetýdiń alańy ǵana emes, qoǵamdaǵy mańyzdy qundylyqtardy nasıhattaıtyn quralǵa aınalyp keledi. Eco Athlete jobasy arqyly biz ekologııalyq jaýapkershiliktiń sportshylar men jas býyn ómiriniń tabıǵı bóligine aınala alatynyn kórsetkimiz keledi, — dep atap ótti Qazaqstan UOK ókilderi.
Aıta keteıik, Eco Athlete jobasy sport, bilim jáne tájirıbelik is-sharalar arqyly ekologııalyq mádenıetti damytýǵa jáne turaqty ekologııalyq daǵdylardy qalyptastyrýǵa baǵyttalǵan.
Bastama Qazaqstan UOK tarapynan Halyqaralyq Olımpıadalyq komıtet pen Azııa Olımpıada keńesiniń qoldaýymen Olımpıadalyq kún tártibi 2020+5 baǵdarlamasy aıasynda júzege asyrylyp keledi.
Buǵan deıin Qazaqstan UOK Atqarýshy komıtetiniń jańa quramy bekitilgenin jazdyq.
