Qazaqstan unyn ótkizý naryqtary jyl saıyn azaıyp keledi – mınıstr

ASTANA. QazAqparat – Qytaıǵa astyqtyń óńdelgen ónimderin eksporttaý kólemi artady. Bul týraly Senatta ótip jatqan Úkimet saǵatynda Aýyl sharýashylyǵy mınıstri Erbol Qarashókeev aıtty, dep habarlaıdy QazAqparat tilshisi.

2022 jyldyń qorytyndysy boıynsha azyq-túlik ónimderin óndirý 3,9% artyp, 2,9 trln teńgeni qurady. Salaǵa ınvestıtsııalar aǵymy kóbeıip keledi, 2022 jyly negizgi kapıtalǵa salynǵan ınvestıtsııalar kólemi 141 mlrd teńgeni qurady nemese 12% artty. Bıylǵy 5 aıda negizgi kapıtalǵa baǵyttalǵan ınvestıtsııa 30 paıyzǵa ósti. Jeke pozıtsııalar boıynsha óndiris kólemin ósirý esebinen 2022 jylda agroónerkásiptik keshen óniminiń eksporty 5,6 mlrd dollarǵa jetip, 2021 jyldyń deńgeıinen 46% kóp boldy

, - dedi E. Qarashókeev.

Vedomstvo basshysynyń aıtýynsha, bul rette qaıta óńdelgen ónimniń eksporty 64% artyp, 2,3 mlrd AQSh dollaryn qurady. Eksporttaǵy óńdelgen ónimniń úlesi bir jylda 37%-dan 42% deıin ósti.

Óńdeý salalarynyń qurylymy boıynsha alǵashqy úshtikti un óndirý (17%), sút ónimderin jáne et ónimderin óndirý (16 paıyzdan) bastap tur. Odan keıingi orynda ósimdik maılary (8%), qant (4%), jarma (2%) óndirisi ornalasqan. Eger naqty baǵyttar boıynsha óńdeý salasyn damytýdy qarastyratyn bolsaq, astyq óńdeý salasy jetekshi oryn alady

, - dedi mınıstr.

Onyń sózine qaraǵanda, 3,3 mln tonna kólemde óndirilgen un elimizdiń ishki naryǵyna qajet deńgeıdi (1,4 mln tonna) artyǵymen qamtamasyz etedi jáne eksporttyq jetkizilim boıynsha álemde kóshbasshy oryndamyz. Byltyr 1,9 mln tonna undy eksportqa shyǵardyq

Otandyq un óndirisimen qamtamasyz etý deńgeıi 237%, makaron ónimderi boıynsha - 122%, al jarma ónimderi 102 paıyzdy qurady. Dástúrli ımporttaýshylar protektsıonıstik qoldaý sharalaryn engizý arqyly óz elderinde qaıta óńdeýdi damytýyna baılanysty Qazaqstan unyn ótkizý naryqtary jyl saıyn azaıyp keledi. Osyǵan baılanysty mınıstrlik ónimdi ótkizý turǵysynda naryqty keńeıtý qadamdaryn iske asyryp jatyr. Máselen, jaqynda Memleket basshysynyń Qytaıǵa sapary aıasynda osy elge astyqtyń óńdelgen ónimderiniń eksportyn ulǵaıtý jáne jetkizýshiler tizilimine jańa kompanııalardy qosý boıynsha kelisim jasaldy. Sondaı-aq jańa óndiristerdi ashýǵa bıznesti yntalandyrý úshin astyq daqyldaryn tereńdetip óńdeıtin kásiporyndar salýǵa jáne jańǵyrtýǵa 25% deıin ınvestıtsııalyq sýbsıdııalaý, kredıtter boıynsha syıaqy mólsherlemelerin sýbsıdııalaý, «qarapaıym ekonomıka» aıasynda negizgi jáne aınalym qarajattaryna jeńildetilgen kredıtter bólý, qosylǵan qun salyǵyn 70% deıin tómendetý sııaqty salyq jeńildikterin berý, sondaı-aq eksportaý kezinde 30% deıingi kólik shyǵyndary qaıtarylady

, - dedi Erbol Qarashókeev.