Qazaqstan ýnıversıtetteri majarlyq stýdentterdi kóptep qabyldaýǵa daıyn
ASTANA. KAZINFORM — Qazaqstan ýnıversıtetteri majarlyq stýdentterdi kóptep qabyldaýǵa daıyn. Bul týraly Aqordada elimizge resmı saparmen kelgen Majarstan Prezıdenti Tamash Shýıokpen keńeıtilgen quramdaǵy kelissóz barysynda Memleket basshysy Qasym-Jomart Toqaev aıtty.
- Tereń mádenı jáne tarıhı baılanystar kún tártibimizdiń joǵary deńgeıi sanalady. Halqymyz ortaq tarıhymyzdyń aıasynda aıryqsha mádenıetimizdi bólisedi. Bul bizdiń baýyrlastyq baılanysymyz ben muramyzdyń dáleli. Búginde Astana kósheleriniń birine majarlyq aqyn Shandor Petefıdiń aty berilgen, - dedi Prezıdent.
Sonymen qatar Memleket basshysy Qazaqstan bilim salasynda da Majarstanmen ózara qarym-qatynasty keńeıtýge nıetti ekenin atap ótti.
- Jyl saıyn kóptegen Qazaqstan stýdenti majar ýnıversıtetterinde oqý úshin granttar men stıpendııalar alýyn joǵary baǵalaımyz. Óz kezeginde Qazaqstan ýnıversıtetteri de majarlyq stýdentter men zertteýshilerdi kóptep qabyldaýǵa daıyn. Biz ózara jumys ekijaqty kún tártibimizdiń aıasynda jalǵasýy tıistigin túsinemiz, - dedi Qasym-Jomart Toqaev.
Aıta keteıik, Aqordada Memleket basshysy Qasym-Jomart Toqaev elimizge resmı saparmen kelgen Majarstan Prezıdenti Tamash Shýıokty qarsy aldy.