Qazaqstan ýnıversıtet ashý úshin AQSh pen Úndistan oqý oryndaryn zertteıdi

ASTANA. KAZINFORM — Qazaqstanda jasandy ıntellektke arnalǵan arnaıy ýnıversıtet ashý máselesine Ǵylym jáne joǵary bilim mınıstri Saıasat Nurbek pikir bildirdi.

— Tapsyrmany qabyldap, barlyq nusqany zerttep jatyrmyz. Ýnıversıtettiń qaı jerde jáne qandaı úlgide ashylatynyn qazir naqty aıtý qıyn. Álemdik tájirıbede túrli model bar. Máselen, Birikken Arab Ámirlikterinde Muhammed ben Zaıd atyndaǵy jasandy ıntellekt ýnıversıteti ǵylymı-zertteýge baǵyttalǵan. Onda tek magıstratýra men doktorantýra deńgeıinde bilim beriledi. Al Úndistanda ashylǵan ýnıversıtet tek bakalavrıatqa mamandanǵan. Ol oqý ornyna túsetin stýdentter «men bolashaqta mıllıarder bolamyn» degen maqsatpen keledi. Biz osy tájirıbelerdiń barlyǵyn saraptap, Qazaqstanǵa eń tıimdi úlgisin engizemiz. Osy maqsatta AQSh pen Úndistandaǵy jobalardy da zerdeleımiz, — dedi mınıstr.

Mınıstrliktiń málimetinshe, jańa oqý ornynyń tujyrymdamasy daıyndalǵan soń, onyń qurylymy men baǵyttary anyqtalatyn bolady.

Buǵan deıin Memleket basshysy Qasym-Jomart Toqaev Úkimetke jasandy ıntellekt negizinde ázirlengen ulttyq onlaın-platformany iske qosýdy tapsyrǵan bolatyn.