NUR-SULTAN. QazAqparat – 20 aqpan men 20 naýryz kúnderi Qazaqstannyń úsh qalasynda VIII Qysqy Qazaqstan ýnıversıadasy ótedi, dep habarlaıdy QazAqparat tilshisi.
Bıylǵy ýnıversıada Ábý Nasyr ál-Farabıdiń 1150 jyldyq mereıtoıyna arnalady.
«Memleket basshysynyń Joldaýynda buqaralyq dene shynyqtyrýdy órkendetý isin tapsyrǵan edi. Memleketten qarajat bólingen soń, mindetti túrde jetistik kerek deımiz. Al stýdenttik sportty jónge keltirmeı, joǵarǵy jetistikke jetý qıyn. Keı sporttan nátıje kórsetý úshin shetelderden sportshylar ákelip jatamyz. Legıoner ákeletin zaman ótti. Osynsha ýaqytta elimiz tanymal boldy. Endi óz sportshylarymyzdyń kóbeıtý qajet. Qazaqstan Ýnıversıadasy sporttyń 5 túrinen ótedi. 20-24 aqpanda Óskemende qysqy prezıdenttik kópsaıys ótedi. Kerlıng – 26 aqpan-7 naýryzda Almatyda, qysqy sporttyq baǵdarlaý – 4-9 naýryz kúnderi Rıdderde bıatlon men shańǵy jarysy bolady», - dedi Ulttyq ǵylymı-praktıkalyq dene tárbıesi ortalyǵynyń dırektory Sadyq Mustafaev elordada ótken brıfıngte.
Qazaqstandyq ýnıversıadada top jarǵandar 2021 jyly 21-31 qańtarda Shveıtsarııanyń Lıýtsern qalasynda ótetin HHH Búkilálemdik qysqy ýnıversıadaǵa qatysady.
«Qazaqstan Búkilálemdik ýnıversıadaǵa 10 sport túrinen qatysady. Stýdent az qatysatyn sport túrlerinen elimizde jarys uıymdastyrmaı-aq, chempıonat jeńimpazdaryn alyp baramyz. Bıylǵy ýnıversıadaǵa bar bolǵany 9 ýnıversıtet qana ótinim berdi. Olar – S. Asfendııarov atyndaǵy Qazaq ulttyq medıtsınalyq ýnıversıteti, M.H.Dýlatı atyndaǵy Taraz memlekettik ýnıversıteti, Qostanaı memlekettik pedagogıkalyq ýnıversıteti, D.Serikbaev atyndaǵy Shyǵys Qazaqstan memlekettik tehnıkalyq ýnıversıteti, M.Qozybaev atyndaǵy Soltústik Qazaqstan memlekettik ýnıversıteti, Qazaq ulttyq qyzdar pedagogıkalyq ýnıversıteti, Qazaqstan-Amerıka derbes ýnıversıteti, Ahmet Baıtursynov atyndaǵy Qostanaı memlekettik ýnıversıteti jáne Shoqan Ýálıhanov atyndaǵy Kókshetaý memlekettik ýnıversıteti. Qysy uzaq Qaraǵandydan, Pavlodardan habar joq. Aqmola oblysy áli bir Smırnovtyń jetistigin aıtyp kele jatyr. Sondyqtan, soltústik óńirlerdegi stýdentterdi sporttyq sharalarǵa belsendi qatysýǵa shaqyramyz», - dedi S. Mustafaev.
Sonymen birge, dene shynyqtyrý muǵalimderine óz shákirtteriniń halyqaralyq jarystardaǵy nátıjesi úshin syıaqy berý maqsatynda Oqýshylar men muǵalimderdiń sporttyq nátıjeleri bazasyn qurý máselesi qarastyrylýda.
«Dene shynyqtyrý jáne sport týraly» zańǵa oblystyq, qalalyq jáne aýdandyq bilim bólimderine balalar men jasóspirimder dene shynyqtyrý klýbtaryn ashý týraly usynystar engizilgen.
Sondaı-aq, Ulttyq ǵylymı-praktıkalyq dene tárbıesi ortalyǵy voleıboldan «Qazaqstan Stýdentter lıgasyn» uıymdastyrady. Lıga 5 kezeńnen turady jáne FIVB halyqaralyq erejelerine sáıkes ótkiziledi. Alǵashqy kezeń 2020 jyldyń 23 aqpanynda bastalady.
