Qazaqstan unyn Taıaý Shyǵys pen Afrıka elderine shyǵarý máselesi pysyqtalyp jatyr

ASTANA. KAZINFORM — Qazaqstan unyn Taıaý Shyǵys pen Afrıka elderiniń naryqtaryna shyǵarý máselesi pysyqtalyp jatyr. Bul týraly Májilis depýtattarynyń saýalyna Premer-mınıstrdiń orynbasary — Ulttyq ekonomıka mınıstri Serik Jumanǵarın jaýabynda aıtylǵan.

— Búgingi tańda qazaqstandyq unnyń negizgi ótkizý naryqtary — Ortalyq Azııa elderi, Aýǵanstan, Reseı. Atalǵan baǵyttar boıynsha jyl saıyn shamamen 2 mln tonna un eksporttalady. 2024 jyly Qytaıǵa mal azyqtyq un eksporty 5,8 ese ósip, 1,2 mln tonnany qurady. Sonymen qatar, Taıaý Shyǵys pen Afrıka elderiniń naryqtaryna shyǵý máselesi pysyqtalýda. Osy turǵyda Iranǵa, Taıaý Shyǵys elderine (BAÁ, Saýd Arabııasy, Kýveıt, Oman jáne t. b.), Grýzııaǵa jáne odan ári Eýropaǵa jóneltile otyryp, Transkaspıı halyqaralyq kólik marshrýty (budan ári — THKM) belsendi qoldanylýda, — dedi vıtse-premer.

Onyń atap ótýinshe, Qazaqstannyń THKM ýchaskesinde Digital Trade Corridor mýltımodaldy tsıfrlyq platformasy jumys isteıdi. 2024 jyly Ázerbaıjan jáne Grýzııa temir joldarynyń IT-júıelerimen ıntegratsııa aıaqtaldy. Túrkııa temir joldarymen ıntegratsııalaý jalǵasyp jatyr.

— Bul marshrýt boıynsha júktiń jetkizilý merzimin 25 kúnnen 13 kúnge deıin qysqartýǵa múmkindik berdi. 2027 jylǵa deıin dálizdiń ótkizý qabiletin jylyna 6 mln tonnadan 10 mln tonnaǵa deıin ulǵaıtý josparlanyp otyr, — dedi Serik Jumanǵarın.

Buǵan deıin vıtse-premer astyq eksportynyń jańa naryqtary týraly málimet bergen edi.