Qazaqstan undy qosa alǵanda 12,1 mln. tonna astyq eksporttap, rekordtyq kórsetkishke qol jetkizdi

Atap aıtqanda, QR Statıstıka agenttiginiń jáne «Qazaqstan temir joly» UK» AQ derekteri boıynsha 2011 jyldyń 1 shildesinen bastap 2012 jyldyń 30 maýsymyna deıin undy qosa alǵanda 12,1 mln. tonna astyq eksportqa shyǵaryldy. Bul týraly búgin Aýyl sharýashylyǵy mınıstrliginde ótken brıfıng barysynda Aýyl sharýashylyǵy keshenindegi ekonomıkalyq saıasatty taldaý ortalyǵy» JShS dırektory Saǵyntaı Jumajanov málim etti.

«Bundaı astyq eksportynyń kórsetkishi bizdiń respýblıkamyzdyń tarıhynda buǵan deıin bolǵan emes. Mysal úshin aıta ketsek, táýelsizdikten beri eń joǵarǵy kórsetkish 2007-2008 jyldary oryn alyp, bunyń ózi 9 mln. tonna kóleminde ǵana bolǵan edi. Al qazirgi kórsetkishimiz odan 3 mln. tonnaǵa artyq. Al bıylǵy marketıngtik jyldyń kórsetkishi 2010-2011 jyldardaǵy deńgeıden 2,2 esege artyq», - deıdi Saǵyntaı Jumajanov.

Onyń aıtýynsha, marketıngtik jyl boıynsha eksportqa shyǵarylǵan astyqtyń kólemi aıyna orta eseppen alǵanda 1 mln. tonnadan asqan. Bul da óte joǵary kórsetkish bolyp tabylady. «Jalpy eksporttyń ishindegi astyq - 8,4 mln. tonnany, un túrindegi eksport 2,6 mln. tonnany qurady», - deıdi S. Jumajanov.