Qazaqstan un eksporttaýdan 4 jyl qatarynan birinshi orynda keledi - Aýyl sharýashylyǵy mınıstri
ASTANA. 14 jeltoqsan. QazAqparat /Marlan Jıembaı/ - Qazaqstan un eksporttaýdan 4 jyl qatarynan birinshi orynda keledi. Bul týraly búgin selektorlyq rejımde ótken Úkimet otyrysynda QR Aýyl sharýashylyǵy mınıstri Aqylbek Kúrishbaev málim etti.
Mınıstrdiń atap ótýinshe, aǵymdaǵy jyldyń basynan qazirgi kezge deıingi aralyqtaǵy aýyl sharýashylyǵy ónimderi óndirisiniń jalpy kólemi 1,3 trln. teńgeni quraǵan. Bul rette qurǵaqshylyq saldarynan óndiris kóleminiń qysqarýyna baılanysty ósimdik sharýashylyǵynan alynatyn ónimder 22 paıyzǵa tómendegen. Al mal sharýashylyǵy ónimderi 3 paıyzǵa artqan.
Aǵymdaǵy jyly oblys ákimderiniń aldyn ala derekteri boıynsha, astyqtyń jalpy jınalymy býnkerlik salmaqpen 13,9 mln. tonna bolǵandyǵyn atap ótken A.Kúrishbaev: «Ortasha ónimdilik 1 gektardan 9 tsentner boldy. Bul ótken jylǵy deńgeıden 4,9 tsentnerge az. Sonymen birge jyl basynan beri 8,2 mln. tonna astyq eksportqa jóneltildi. Bul ótken jylǵy deńgeıden 34,5 paıyzǵa jýyq artyq. Osylaısha, astyq eksportynyń jalpy kóleminde shamamen 38 paıyzdy quraıtyn un eksporty boıynsha tórtinshi jyl memleketimiz álemde birinshi orynda keledi», - dedi.
