Qazaqstan Uly Otan soǵysyndaǵy ortaq jeńis týraly aqıqatty saqtaý isinde barlyq halyqtarmen birge - N. Nazarbaev
Búgin Aqordada birqatar soǵys ardagerlerine memlekettik nagradalardy tapsyrý rásiminde Elbasy Nursultan Nazarbaev osylaı málimdedi, dep habarlaıdy QazAqparat.
«Qazirgi tańda sol surapyl soǵystyń balama tarıhy paıda bolýda, faktiler men oqıǵalar burmalanyp, fashızmniń qaýpi jasandy túrde jeńildetilip jatyr. Biz qazirgi álemniń sonshalyqty osal ekenin jáne bizdiń órkenıetke birlesý qajettigin jaqsy túsinemiz. Biz bárimizge ortaq Uly Jeńisimiz týraly aqıqatty saqtaý isinde barlyq halyqtarmen birge bolǵanbyz jáne bola beremiz», dedi óz sózinde N. Nazarbaev.
Osy oraıda Memleket basshysy Qazaqstan ótkendi jadynda ustap, keleshek urpaqtyń aldyndaǵy óziniń jaýapkershiligin uǵyna otyryp ıadrolyq qarýdan bas tartqanyn, bizdiń el qazirgi tańda ǵalamdyq qarýsyzdaný isinde aldyńǵy qatarda turǵanyn atap kórsetti. «Saıyp kelgende, 1945 jylǵy bizdiń jeńisimiz búkil adamzattyń ómirin 100, 200 jylǵa, tipti birneshe júz jyldyqtarǵa aldyn-ala anyqtap qoıdy. Bul jeńis bolmaǵanda ǵalamshardyń, ondaǵy Eýropa men Azııanyń ómiri múldem basqasha bolýy yqtımal edi. Sol kezdegi Uly Jeńis keleshekke úmit otyn jaqty, azattyq, teńdik, abyroı-namys, adamgershilik, beıbitshilik jáne baqyt tárizdi bazalyq qundylyqtarǵa jańa uǵym berdi», dedi Elbasy.
Bul rette N. Nazarbaev jeńis tarıhy keleshek urpaqty patrıottyq sezimde tárbıeleýde, halyqtar arasyndaǵy myǵym dostyqty nyǵaıtýda basty mysal retinde qala berýi úshin qoldan kelgenniń barlyǵyn jasaý - ortaq mindet ekenin atap kórsetti.
