«Qazaqstan» ulttyq telearnasyndaǵy jańa maýsym búgin eki jańa telehıkaıamen bastalady
ASTANA. QazAqparat - «Qazaqstan» ulttyq telearnasyndaǵy jańa maýsym búgin «Qara shańyraq» jáne «Qubylaı han» eki jańa telehıkaıamen bastalady, dep habarlady ulttyq arnanyń baspasóz qyzmeti.
«Qara shańyraqtyń» basty keıipkerleri - qarapaıym otbasynda ósken úsh aǵaıyndy jigit. Úsheýiniń de negizi jaqsy, áý basta ata-analary jaqsy tárbıege baýlyǵan. Biraq, túsken ortalary, júrgen aınalasy basqa.
«Qara shańyraq» kartınasynyń sıýjetiniń negizinde aǵaıyndy úsh baýyrdyń taǵdyry, olardyń tańdaǵan ómir joldary jatyr. Úlkeni Álisher - beldi top-menedjer, bıznesmen. Alaıda, jeke ómirinde bir sheshim bolmaǵannan, túrli problemalarǵa tap bolady. Dáýlet - ortanshysy, burynǵy sportshy, qazirgi ýaqytta bapker. Jas ánshi Lındamen kezdesý arqyly ol jetken jetistiginde toqtap qalmaı, alǵa umtyla berý qajettigin túsinedi. Mádı ata-anasymen qalǵan kenje, ákesiniń isin jalǵastyrýshy - sharýa qojaıyny. Ol ákesiniń qamqorlyǵynan shyǵyp, óz ómiriniń ıesi bolýǵa talpynady. Árqaısysynyń jeke ómirleri, tıisinshe jeke problemalary bar jáne olar barlyq júz serııa boıynda olardy sheshýge talpynady.
Serıal «Qazaqstan» telearnasynda 25 tamyzdan bastap dúısenbi men beısenbi aralyǵynda 21.50-de orys tilindegi sýbtıtrmen kórsetiledi.
Búgin «Qazaqstan» ulttyq telearnasynyń efırinde Shyńǵyshannyń nemeresi, Tóleı ulynyń ómiri, basqarýy jáne basyp alýlary týraly sýretteıtin «Qubylaıhan» epıkalyq dramasynyń da premerasy bastalady. Telehıkaıanyń sıýjeti birneshe on jyldyqty qamtıdy jáne mońǵoldardyń uly dınastııasy ıÝannyń, odan keıin uly qytaı ımperııasynyń qurylýyna sebep bolǵan oqıǵalar týraly baıandaıdy.
50 serııadan turatyn tarıhı drama Qytaı elinde úlken tabysqa jetip, qymbat jobalardyń biri boldy. Telehıkaıa Gonkong, Taıland, Malaızııa, Koreıa, Taıvan, Vetnam, AQSh, Kanada elderinde de úlken tabyspen ótti. Telehıkaıanyń bıýdjeti 250 mln AQSh dollaryn qurady. Týyndyda 5 myńǵa jýyq akter oınaıdy. Sondaı-aq, túsirilim jumystaryna 5 myńǵa jýyq at qatystyryldy. Tarıhı dramanyń qoıýshy rejıssery - Tsýı Sıý Mın.
Dál osy telehıkaıa Qubylaıhannyń jaqyny bolǵan, ákesiniń ornyn basýǵa talpynǵan búlikshilerdi basqarǵan ulyna qarsy kúreske Venetsııadan jas Marko Polo kelgen kezdegi, batys pen Shyǵys arasyndaǵy alǵashqy qatynastardyń qalyptasýy týraly baıandaıdy. Marko Polo keıinnen ıÝan ımperııasynyń ómiriniń sıpattamasyn qaldyrǵan. Marko Polonyń baıandaýynyń áserinen Qubylaıhan Batystaǵy erekshe tanymal tarıhı tulǵaǵa aınalyp, onyń aty jańadan tanyla bastady.
Dramalyq oqıǵalarǵa, saraı ishindegi shytyrman men zulym nıetterge, taq pen jańa jerlerge ıelik etý úshin keskilesken urys pen tartysqa toly kóp serııalyq álemdik bestsellerdiń Qazaqstandaǵy premerasy «Qazaqstan» ulttyq telearnasynda saǵat 19.30-da dúısenbi men juma aralyǵynda orys tilindegi sýbtıtrmen kórsetiledi.
