«Qazaqstan» ulttyq telearnasynda «Paryz» telehıkaıasy qaıtadan kórsetile bastaıdy
ASTANA. 24 qańtar. QazAqparat - «Qazaqstan» ulttyq telearnasynan kórermenderdiń suraýy boıynsha «Paryz» telehıkaıasy qańtardyń 28-nen bastap, saǵat 18.05-te qaıta kórsetile bastaıdy dep habarlaıdy «Qazaqstan RTRK» AQ-nyń baspasóz hatshysy.
«Qazaqstan» ulttyq arnasynyń tapsyrysymen «Sataıfılm» túsirgen otandyq telehıkaıa qazaq polıtseıleriniń qylmys álemimen aıaýsyz kúresi baıandalady. Mahabbat pen qatigezdik, adaldyq pen satqyndyq, kásibı sheberlik pen tabandy kúres, ustanymdar qaqtyǵysy sııaqty shytyrman oqıǵalarǵa toly telehıkaıa kórermenimen qaıta qaýyshpaq.
«Sataıfılmniń» bul týyndysy Gollıvýd pen Bollıvýd túsirgen fılmderden esh kem emes. Ulttyq arnanyń tapsyrysy bolǵandyqtan, shyǵarmashylyq top serıaldy túsirýde ulttyq qundylyqtarǵa basymdyq bergen.
Jasulan Poshanov, fılmniń qoıýshy rejısseri:
Bizdiń Іshki ister qyzmetkerleri, tek bizdiń ǵana emes álemdik polıtseıler týraly fılmder kóp. «Paryzdyń» aıyrmashylyǵy, Qazaqstanda bolyp jatqan oqıǵa, qazaqtyń polıtseılerin, olardyń qazaqı qasıetterin kórsetýge tyrystyq.
Qos polıtseı Asan men Nartaıdyń bastan keshkenderi 30 serııaǵa arqaý bolady. Biri - tisqaqqan tártip saqshysy, ekinshisi - oqýdy jańa bitirgen jas maman. Asannyń beınesin Ádil Ahmetov somdasa, Nartaıdyń rólinde Azamat Satybaldy. Ekeýi kópshilikke Astana men Almaty drama teatrlarynyń beldi akterlary retinde jaqsy tanys.
Ádil Ahmetov, akter:
Túsirilim kezinde ártúrli oqıǵalar boldy. Aıaǵymyzdy qaıyryp alǵan kezderimiz. Birimizdiń basymyz birimizdiń betimizge tıgen kezderi esime túsip ketedi.
Azamat Satybaldy, akter:
Ózim ómirde shydamsyzdaý, kúıgelekteý adammyn. Al fılmdegi Nartaıdyń obrazy óte sabyrly «jeti ret ólshep, bir ret kesetin» jigit. Eki aıdan asa Nartaıdyń sabyrlyǵy ózime berilgen sııaqty.
Keıipkerlerdiń jeke qasıetterin boılaryna sińirgen akterlar alǵash ret tapanshadan oq atyp, qolǵa kisen salýdy úırenipti. Sodan bolar, fılmdegi basty trıýkterdi de ózderi oryndaıdy. «Paryz» atty qasterli uǵymdy ómirlik qaǵıda etken jandar men qaraqshylyq joldy serik etkender arasyndaǵy qaqtyǵysta kimniń mereıi ústem bolady? Oqıǵanyń qalaı aıaqtalatynyn bilgilerińiz kelse, «Qazaqstan» ulttyq arnasynan keshki saǵat 18.05-te «Paryz» telehıkaıasyn tamashalańyzdar!
