«Qazaqstan» Ulttyq telearnasynda - «Dostar» atty jańa otandyq telehıkaıa!
ASTANA. 2 sáýir. QazAqparat - «Qazaqstan» Ulttyq telearnasynda 9 sáýir kúni «Dostar» atty jańa otandyq telehıkaıanyń tusaýy kesiledi.
Bul týraly «Qazaqstan» AQ» respýblıkalyq teleradıo kesheniniń baspasóz hatshysy Tanakóz Tolqynqyzy habarlady.
«Dostar» telehıkaıasy elimizdiń bedeldi, aldyńǵy qatarly oqý ordasy stýdentteriniń kúndelikti ómiri, bolashaqqa jasalǵan josparlary men qarapaıym ǵana adamı qarym-qatynastary týraly bolmaq. Kóp serııaly fılm alty stýdent: munaıshy-tehnolog, bıolog, ınjener, til mamany, sotsıolog mamandary arasynda órbıdi. Mektep qabyrǵasyndaǵy tek kitabı bilimmen kelgen tanym-túsinik pen ómirdiń ózinen alynǵan sabaq, sezim men baqtalastyq, adaldyq pen astamdyq, aýyldan kelgen uıańdyq pen qalanyń tákapparlyǵy týraly qarama-qaıshylyqqa toly telehıkaıa kórermendi beıjaı qaldyrmasy anyq. Elimizdiń tańdaýly oqý ornyna túsip, elordanyń jas turǵyny atanǵan stýdentterdiń arman-qııaly men tanym-túsinigi ár túrli. Alýan túrli kózqaraspen kelgen adamdardyń taǵdyry bir alańda toǵysady. Ol - mahabbat alańy. Ómirdiń eń qyzyqty shaǵy - stýdenttik ómirdiń qyzyǵy men shyjyǵyn birge kórgen jastardyń qarapaıym adamı qarym-qatynasyn baıandaıtyn bul telehıkaıa melodrama, komedııa elementteri arqyly negizgi ıdeologııalyq prıntsıpter men qundylyqtardy nasıhattaýǵa baǵyttalady.
«Qazaqstan» ulttyq arnasynan 9 sáýirden bastap dúısenbi men beısenbi aralyǵynda saǵat 21.50-de «Dostar» telehıkaıasyn tamashalańyzdar.
