«Qazaqstan» ulttyq telearnasynda «Áke serti» atty jańa serıaldyń kórsetilimi bastalady
ASTANA. 17 qańtar. QazAqparat - 24 qańtarda «Qazaqstan» ulttyq telearnasynda «Áke serti» atty jańa serıaldyń kórsetilimi bastalady, dep habarlaıdy arnanyń baspasóz qyzmeti.
«Qazaqstan» RTRK AQ-nyń tapsyrysymen, «3 TA Pictures» kompanııasy «Áke serti» dep atalatyn telehıkaıa túsirdi. Bul joba qazaq-túrik mamandarynyń birlesip jasaǵan alǵashqy kórkem týyndysy bolyp otyr. Jobanyń maqsaty - bir jylda júzdegen telehıkaıa túsirip, birshama jetistikterge jetken túrik mamandarymen birlese jumys jasaý arqyly otandyq teleóndiriske jańasha bir lep qosý. Rólderdi qazaq akterleri Saǵat Jylgeldıev, Gúlsharat Jubaeva, Maqsat Sábıtov, Gúlshat Týtova, Áset Imanǵalıev, Qadirbek Demesin, Bolat Ábdilmanov t.b. somdaıdy. Túrik mamandary, dálirek aıtqanda, rejısser Vejıhı Ener, stsenarıı avtory Nýrettın Ózel, beıneınjener Býrak Kaplan, operatorlardyń Shahın Karashahın, Devkan Fyndyk jumysyna kórermen óz baǵasyn bere jatar.
Akterlardy tandaý barysynda qatyp qalǵan qaǵıdalar bolǵan joq. Olardy tek kásibı sheberligine qarap irikteldi.
«Áke serti» telehıkaıasy ózge teletýyndylardan sıýjet jelisiniń ómirsheńdigi jáne kókeıkestiligimen erekshelenedi. Áke men balalar arasyndaǵy baılanys, jaqsy men jaman, aq pen qara, qýanysh pen qaıǵy arasyndaǵy jik pen kózge kórinbes baılanys - máńgilik taqyryp. Telehıkaıaǵa Muhtar Shahanovtyń sózine jazylǵan Nurǵısa Tilendıevtiń «Áke týraly jyr» áni tandap alyndy. Ándi jańasha baǵytta óndep, árlegen Nurlan Qarajigitov. Al «Áke týraly jyr» ánin oryndaǵan S. Qarajigitova.
