«Qazaqstan» Ulttyq telearnasynan «Syrǵalym» atty jańa otandyq telehıkaıa kórsetiledi
ASTANA. 14 qańtar. QazAqparat - 15 qańtarda saǵat 21.50-de «Qazaqstan» Ulttyq telearnasynan «Syrǵalym» atty jańa otandyq telehıkaıa kórsetiledi»- dep habarlady «Qazaqstan» AQ» respýblıkalyq teleradıo kesheniniń baspasóz qyzmetinen.
Oqıǵalar jelisi qarapaıym qazaq otbasynyń kúndelikti tynys-tirshiligin baıandaýdan bastalady. Bir kúni qalada ǵumyr keshetin Jantóreniń shańyraǵyna aýyldan otaǵasynyń jaqyn dosynyń qyzy keledi. Qalalyq otbasyda tárbıelenip jatqan úsh ul alǵashynda qyzdy jaqtyrmaı qaraǵanymen, keıin oqıǵa jelisi basqa arnaǵa burylady. Úlken ul aýyl qyzyna qamqorlyq tanytsa, ortanshysy oǵan ǵashyq bolady. Al, kenje ul qyzdy otbasynan alystatýdy oılastyrady.
Qaımaǵy buzylmaǵan aýyl tárbıesin kórip, ulttyq salt-dástúrmen sýsyndap ósken qyz bala qazaqy bolmysty umytýǵa shaq qalǵan qala turǵyndarynyń ómirine úlken ózgeris ákeledi. Jańa telehıkaıa ádemi qaljyńdar men kórermenge oı salatyn ómirlik oqıǵalarmen kómkerilgen. Uzaqtyǵy 42 mınýttyq 48 bólimnen turatyn melodrama qazaq salt-dástúriniń artyqshylyǵyn dáriptep, tózimdilik, qaıyrymdylyq, qonaqjaılyq syndy qasıetterdi nasıhattaıdy.
«Syrǵalym» telehıkaıasynyń qoıýshy rejısseri Ráshıd Súleımenov, Dmıtrıı Korobkın. Basty rólerdi Juldyz Mahanova, Sher Áli, Omar Qıqymov, Qalampyr Aısanǵalıeva, Álıhan Ydyrysheva, Jandarbek Sadyrbaev somdaıdy.
