«Qazaqstan» Ulttyq telearnasynan alǵash ret «Shámshi» derekti fılmi kórsetiledi
ASTANA. 11 maýsym. QazAqparat - Shámshi týraly fılmdi birinshi bolyp «Qazaqstan» UTA kórermenderi tamashalaıtyn bolady, dep habarlady «Qazaqstan» AQ» respýblıkalyq teleradıo kesheniniń baspasóz hatshysy Tanakóz Tolqynqyzy.
Túsirilýi 20 jylǵa sozylǵan osynaý fılmde Shámshi ómirinen jazyp alynǵan qundy kadrlar bar. «Vals koroliniń» kúndelikti ómirin beınetaspaǵa túsirgen Tilegen Ahmet - osy fılmniń rejısseri.
1991 jyly bastalyp, keıin túrli sebeptermen túsirilýi toqtaǵan derekti lenta 2011 jyly montajdalǵan. Keıbir bólikteri ǵana kórermen nazaryna usynylǵan.
«Shámshi múldem zerttelmegen. Ol týraly derek joq. Sondyqtan, derekti fılm dep ataǵanymyzben, onda kórkemdik-qoıylymdyq epızodtardy engizýge týra keldi. Óıtkeni, halyq kompozıtor týraly neǵurlym kóbirek maǵlumat alǵysy keledi», - deıdi Tilegen Ahmet.
Derekti fılmniń epızodtarynda bala Shámshiniń rólin somdaǵan Shámshi-Qaldaıaq ta stýdııa qonaǵy boldy.
Kompozıtor, shámshitanýshy Qaldybek Qurmanáli - fılmniń prodıýseri. Ol Astananyń 15 jyldyǵy qarsańynda «Shámshi» derekti fılmi «Qazaqstan» Ulttyq telearnasynan alǵash ret kórsetiletindigin aıtyp ótti.
