«Qazaqstan» Ulttyq telearnasy men Sport jáne deneshynyqtyrý isteri agenttigi Yntymaqtastyq týraly memorandýmǵa qol qoıdy
ASTANA. QazAqparat - «Qazaqstan» RTRK men Qazaqstan Respýblıkasy sport jáne dene shynyqtyrý isteri agenttigi arasynda keshe, 1 shildede Yntymaqtastyq týraly memorandýmǵa qol qoıyldy.
Qujatqa «Qazaqstan» RTRK atynan Basqarma Tóraıymy Nurjan Muhamedjanova, Agenttik tarapynan vedomstvo tóraǵasynyń orynbasary Elsııar Qanaǵatov qol qoıdy. Memorandýmǵa sáıkes, taraptar elimizdiń sporttyq ómiri jóninde habarlar taratý, sport túrleri men salaýatty ómir saltyn keńinen nasıhattaý, telearnanyń teleónimderin arttyrý baǵytynda yntymaqtastyq baılanys ornatpaq.
Aıta ketken jón, 2013 jyldyń 1 shildesinde «Qazaqstan» respýblıkalyq teleradıokorporatsııasynyń negizinde elimizde táýligine 21 saǵat habar taratatyn tuńǵysh «KAZsport» telearnasy ashylǵan bolatyn. Arnaıy mamandandyrylǵan telearna Elbasy N.Nazarbaevtyń tapsyrysy boıynsha quryldy. «KAZsport» - Eýropanyń «Eurosport», «Sport 1». «Sport plıýs» telearnalarymen teń dárejede habar taratatyn Ortalyq Azııadaǵy teńdesi joq sporttyq telearna.
Bir jyl ishinde «KAZsport» telearnasynyń kórermenderi tikeleı efırden sport túrlerinen eki myńǵa jýyq translıatsııany tamashalady. Sheteldiń barlyq sport sharalarynda telearnanyń túsirilim toptary jumys istedi.
12 aı ishinde «KAZsport» dańqty sportshylar, sport túrleri boıynsha komandalar jaıynda 36 derekti fılm túsirdi. «Siz qaıdasyz, chempıon?» tsıkly sheńberinde 87 baǵdarlama daıyndalyp, efırge berildi. Munyń barlyǵy kún saıyn efırge shyǵatyn jańalyqtar men arnaıy reportajdarmen tolyǵyp otyrdy.
Sonymen qatar, «KAZsport» álemdik tájirıbeni de engizýde. Alǵash ret otandyq teledıdar tarıhynda «KAZsport» telearnasynyń kommentatorlary oqıǵa ornynan - Brazılııadaǵy fýtboldan álem chempıonaty ótip jatqan stadıondardan tikeleı reportajdar júrgizýde.
Bıylǵy telemaýsymda telearna aǵylshynnyń Premer-Lıgasyn, jazǵy Azııa oıyndaryn, jasóspirimder arasyndaǵy Olımpıada oıyndaryn, Almatyda ótetin aýyr atletıkadan álem chempıonatyn jáne taǵy da basqa sport sharalaryn kórsetýdi josparlap otyr.
«KAZsport» telearnasynyń týǵan kúnine oraı birneshe iri joba ázirlendi. Sonyń bireýi - aty ańyzǵa aınalǵan gımnasshy, olımpıada oıyndarynyń bes dúrkin chempıony týraly túsirilgen «Bizdiń Kımanellı» derekti fılmi. «KAZsport» telearnasy otandyq teledıdar tarıhynda alǵash ret ataqty chempıon týraly ómirbaıandyq fılm túsirdi.
