«Qazaqstan» ulttyq telearnasy Golovkın men Leme arasyndaǵy jekpe-jekti tikeleı efırde kórsetedi

Bul týraly telearnanyń baspasóz qyzmeti habarlady.

WBA (Super), IBO jáne WBC (Interim) nusqalary boıynsha orta salmaqtaǵy álem chempıony qazaqstandyq boksshy Gennadıı Golovkın 17 qazan kúni kanadalyq Davıd Lemege qarsy jekpe-jekke shyǵady. Kezdesý AQSh-tyń Nıý-Iork qalasyndaǵy «Medıson Skver Garden» arenasynda ótedi.

Kanadalyq boksshy Davıd Leme osyǵan deıin 36 kezdesý ótkizip, onyń 34-inde jeńiske jetse, 31 kezdesýin nokaýtpen aıaqtaǵan. Al, eki kezdesýinde jeńilip qalǵan.

Ol sońǵy kezdesýin bıyl 20 maýsymda frantsýz boksshysy Hassan N Dam N Jıkamǵa qarsy ótkizip, jeńiske jetken. Eske sala keteıik, Gennadıı Golovkın sońǵy jekpe-jegin bıyl 17 mamyr kúni amerıkalyq kishi Vıllı-Monromen ótkizip, 6 raýndta nokaýtpen utqan.