Qazaqstan ulttyq múddesin qorǵaýǵa baǵyttalǵan konstrýktıvti syrtqy saıasatyn jalǵastyrady
ASTANA. QazAqparat – Qazaqstan óz ulttyq múddesin qorǵaýǵa baǵyttalǵan teńgerimdi jáne konstrýktıvti syrtqy saıasatyn júzege asyrýdy jalǵastyrady. Bul týraly QR Prezıdenti Qasym-Jomart Toqaev saltanatty ulyqtaý rásiminde aıtty, dep habarlaıdy QazAqparat tilshisi.
«Qazaqstan óz ulttyq múddesin qorǵaýǵa baǵyttalǵan teńgerimdi jáne konstrýktıvti syrtqy saıasatyn júzege asyrýdy jalǵastyrady. Reseımen, Qytaımen jáne Ortalyq Azııadaǵy baýyrlas memlekettermen, ıntegratsııalyq birlestikter jónindegi seriktestermen aradaǵy ózara tıimdi yntymaqtastyq pen strategııalyq áriptestik máseleleri basty nazarda bolady», - dedi Qasym-Jomart Toqaev.
QR Prezıdenti basqa memlekettermen de elimiz kópjaqty yntymaqtastyqty damytatyndyǵyn basa aıtty.
«AQSh-pen, Eýropalyq Odaqpen, Azııa, Taıaý Shyǵys jáne Kavkaz memleketterimen, sondaı-aq basqa múddeli elderdiń barlyǵymen kópjaqty yntymaqtastyqty damytý úshin bar kúsh-jigerimizdi jumsaımyz. Qazaqstan qazirgi halyqaralyq quqyq pen BUU Jarǵysyn berik ustanatyn el bolyp qala beredi», - dedi Memleket basshysy.
