Qazaqstan ulttyq quramasynyń Kabo-Verdemen oıyny ótpeıtin boldy - QFF
ASTANA. QazAqparat -16 maýsymda Almatyda josparlanǵan fýtboldan Qazaqstan ulttyq quramasy men Kabo-Verde quramasy arasyndaǵy match ótpeıtin boldy. Bul týraly Qazaqstan fýtbol federatsııasynyń baspasóz qyzmetinen habarlandy.
Federatsııanyń bas menedjeri Asqar Orynhaevtyń aıtýyna qaraǵanda, Qazaqstan ulttyq quramasynyń bastapqy josparynda úsh match ótkizý qarastyrylǵan bolatyn. «Aldyn ala oıyndar kestesi kelisilip, FIFA kúntizbesine engizilgen de edi. Sol josparǵa sáıkes, 12 mamyrda bizdiń qurama komanda Almatyda Býrkına Faso quramasymen match ótkizdi. Jaqynda ǵana Túrkııa komandasyna qarsy oınady. Alaıda, úshinshi oıyndy ótkizýge úlken qıyndyqtar týyndap otyr. Josparlanǵan kezdesýge on kún qalǵanda Kabo-Verde oıyn ótkizýden aınyp, bul týraly elektrondy poshtamyzǵa hat joldapty. Bizde bundaı jaǵdaı esh ýaqytta bolmaǵan, óıtkeni, fýtbol áleminde qalaı bolǵanda da ereje men tártip saqtalýy tıis bolatyn. Al bizdiń áriptesterimiz óz bilgenderin istep otyr», deıdi federatsııa bas menedjeri.
Onyń sózine qaraǵanda, az ǵana ýaqyt ishinde halyqaralyq match úshin jańa qarsylas tabý esh múmkin emes. Sonymen qatar, bas menedjer josparlanǵan matchtyń ornyna Qazaqstan quramasy Ýgandamen kezdesedi degen aqparatty da joqqa shyǵardy. «Bul týraly naqty túsindirip, aıta keteıin, ondaı matchty 16 maýsymda ótkizý FIFA dırektıvasyna qaıshy keledi jáne bizdiń quramamyzǵa sanktsııa salýǵa soqtyrýy yqtımal. Sondyqtan da, qansha tyryssaq ta 16 maýsymda bizdiń quramanyń eshqandaı matchyn ótkizý múmkin emes», - deıdi A. Orynhaev.
Osyǵan oraı, Qazaqstan fýtbol federatsııasy barlyq jankúıerlerine qoldaý bildirgenderi úshin rızashylyǵyn bildire otyryp, Almatyda dop dodasynyń ótpeıtinine ókinish bildiredi. Al Qazaqstan men Kabo-Verde quramalarynyń oıynyna bılet alǵan jankúıerler jaqyn aralyqta bılet somasyn 100 paıyzǵa qaıtaryp alady. «Keltirilgen qolaısyzdyqtar úshin keshirim suraımyz», - delingen baspasóz málimdemesinde.
