Qazaqstan ulttyq quramasy erteń Parıjde bastalatyn aýyr atletıkadan álem chempıonatyna attanyp ketti
ASTANA. 4 qarasha. QazAqparat - Erteń, 5 qarasha kúni Parıj qalasynda aýyr atletıkadan álem chempıonaty bastalady.
Qazaqstan ulttyq quramasynyń bas bapkeri Alekseı Nı bastaǵan ziltemirshi sańlaqtarymyz dúbirli dodaǵa attanyp ketti.
Olımpıada oıyndarynda, álemdik jáne halyqaralyq jarystarda jasyndaı jarqyldap júrgen sportshylarymyz osy joly da joǵary nátıje kórsetedi degen senimdemiz.
Álemdik dodaǵa Olımpıada jeńimpazy Ilıa Ilın men jas daryn Almas Óteshev 94 keli salmaq boıynsha qatysady. Al Álem chempıony Vladımır Sedov 105 kelide baq synaıdy. Sondaı-aq 105 kelide Sergeı Istomın óz kúshin áıgilemek. Jáne 77 kelide Kırıll Pavlov, 85 kelide Vladımır Kýznetsov, 105 keliden joǵary salmaqta Dmıtrıı Kaplın men Aleksandr Zaıchıkov syndy ziltemirshilerge senim artylyp otyr.
Al áıelder arasynda áıgili eki dúrkin Álem chempıony Svetlana Podobedova 75 keli salmaq boıynsha ziltemirdi kóterýge shyǵady. Sonymen qatar Álem chempıondary 53 kelide Zúlfııa Chınshanlo men 63 kelide Maııa Maneza Parıjdegi saıysqa túspek. Al 69 keli boıynsha Irına Nekrasova, 69 kelide Jazıra Japarqul, 75 kelide Anna Nurmahambetova, 75 keliden joǵary salmaqta Aleksandra Aborneva baq synaıdy.
Parıj qalasyndaǵy aýyr atletıkadan ótetin álem chempıonatynyń tartysty básekelerin Qazaqstannyń «Elarnasy» jáne «Eýrosport» telearnalary kórsetedi dep kútilýde.
Álem chempıonaty 13 qarasha kúni aıaqtalady.
